Lonzon: Di maayo kon daghan og anak?

PARA nako di man tingali maglisod ang kahimtang sa pagpuyo sa usa ka pamilya kon responsable lang ang mga ginikanan. Akong nabantayan nga ang pagpatuyang sa pagdaghan sa mga anak maoy nag-unang hinungdan sa ilang kalisud. Mosamot na kon apilan pa og bisyo.

Mao nga di lang unta parehasan sa magtiayon ang ilang kahimtang nga mahisama sa anay ug butakal nga wa magplano kay baboy man lagi sila. Ang naka­bintaha lang kay ang baktin nga ilang gipanganak mabaligya man.

Apan, ang tawo di man gyud na mahitabo nga mabaligya kay di man na sila mananap. Apan tungod lagi sa kalisud mao nga nahitabo ang pagbaligya apan ang ilang pagkababaye. Sa rason nga maluoy sa ilang mga manghod kay ang ginikanan way tarong nga trabaho.

Tungod niini nakapangutana ta: Maayo ba ang daghan og anak? Naa gani mga adunahan misamot kanindot ang ilang pagpuyo kay nagkontrol sa gidaghanon sa ilang mga anak. Kita pa kaha nga nag ilaid sa tumang kalisod?

NAMATAY SA IRONMAN

Usa sa akong mga amigo ug amiga nga sama na nako’g pangidaron nga miabot na sa edad nga 40 anyos mapasirgabuhon sa pag-agni kanako sa pagsalmot sa bag-o nilang hobby nga mao ang running.

Igo lang kong niingon nga sa nag-edad pa ako og 19 anyos nagsigi na kog dagan. Gani nakaapil nako sa 21K marathon ug nakapadagan sa akong racer bike ug kapin sa 200 kilometers sud lang sa usa ka adlaw.

Apan karon sa akong pamati makaya pa, apan ang edad maoy babag aron moapil sa kompetisyon nga atong kontra mga batan-on pa. Sa akong tan-aw kini sila nabag-unahon lang mao nga sobra ka agresibo.

Mao nga ako lang tambag magpahiling sa doctor aron masuta ang kondisyon sa lawas.

Hinumdumi kanang runners ug seklista nga inyong makita nga may edad na, insakto kana sa training kay sukad pa sa ilang kabatan-on mao na kana ang ilang paboritong sports.

Likayi nga mahitabo kaninyo ang nahitabo ni Ramon Igaña, partisipante sa Ironman 70.3 nga namatay sa acute pulmonary embolism ug di tungod sa aksidente nga natumba ang iyang gimaniho nga bisiklita.

PAGBALIK NI TOTOL

Sa akong tan-aw mosamot ang kadasig ni Atty. Totol Batuhan, kanhi undersecretary sa DOTC, sa pagbalik pagdagan sa south district sa siyudad sa Sugbo, alang sa pagka kongresista karon nga mipadayag sa ilang suporta ang urban poor alliance.

Kay naprobar naman gud sa maong grupo ang pagpadaog og duha ka mga konsehal sa miaging election. Hinoon si Batuhan napakyas na sa iyang pagsuway nga makuha ang maong katungdanan dihang gipildi siya ni Tony Cuenco, kanhi kongresista.

Karon subli na usab silang magsangka kauban na ni Konsehal Bebot Abellanosa. Ato ning paabuton dili lang ang sa pagka kongresista apil na ang init nga kumbate tali ni Cebu City Mayor Mike Rama kontra Tomas Osmena, kongresista sa south district alang sa posisyon sa pagka mayor.

FOOD SUPPLEMENT

Maayo tingali og dunay kaugalingong doktor nga maoy resita sa inyong tambal kaysa anang magpataka lang mog palit og food supplement. Kini nakapahinumdum kanako sa komentaryo sa usa ka doktor nga mitambong sa usa ka media forum ( Tapok-tapok sa NS Hotel) nga “kining maong tambal di makaayo.”

Ako ning gisuwat kay dunay mireklamo nga nagsakit ang iyang dughan ug mihap ang iyang panan-aw ug mahal pa gyud kaayo . Grabi na kaayo ka popular karon ang food supplement tungod sa mga advertisement sa radyo ug telebisyon. efren_lonzon@yahoo.com; 09327380888