Editoryal: Angay usab mangandam

DILI lalim kining kadaot nga nahimo karon sa lunop nga mihugpa sa Metro Manila ug ubang dapit sa Luzon.

Molungtad na’g dul-an sa usa ka semana nga way puas ang pagsigi og ulan nga maoy hinungdan sa pagtubo sa tubig sa pipila ka mga dapit sa Kaulohan.

Ang pagkabara sa kanal tungod sa mga sagbot ilabi na sa mga plastic nga nihuot sa imburnal, ang kagagmay usab sa mga drainage ug ang kakuwang na karon sa mga kakahoyan sa palibot didto sa Kaulohan maoy nag-unang rason kon nganong naingon ani kining tanan.

Atong makita ang mga footages sa mga television ug ingon man mga hulagway sa mga mantalaan nga makapaikbi sa atay kon unsa kalisod ang atong mga kaigsuonan aron makaipsot sa taga liog na nga tubig nga miguba sa ilang mga kabtangan.

Mga poste sa suga nga nangatumba ug mga dagkong edipisyo ang gipanglunopan nga maoy nakaparalisa sa mga operasyon sa mga buhatan.

Ning pagsulat, gikataho nga aduna nay 16 ka mga kinabuhi ang nakalas ug dunay pipila usab ang nawala.

Mokabat ngadto sa 850,000 kapin ka mga residente ang mibakwit gikan sa ilang pinuy-anan.

Ang nahitabo sa Manila, di halayo nga mahitabo usab dinhi sa atoa.

Hinumdomi nga niadtong Enero sa tuig 2010, sud lang gani sa dul-an 90 minutos nga pagsigi og ulan, grabi na ang pagsaka sa tubig nga milunop sa pipila ka dapit sa dakbayan sa Sugbo ug sa Mandaue.

Naalarma ang pipila nato ka mga molupyo ilabi na kadtong haduol sa mga sapa. Tulo ka mga sapa ang miawas ug gatosan ka mga molupyo ang namakwit.

Hinaot nga ang nahitabo sa Kaulohan maoy ka­panaminan sa atong lokal nga pangagamhanan.

Di man tuod kapugngan, apan bintaha na lang kon kini kapangandaman.