Barrita: Manila ‘water world’

NAHIMONG usa ka “water world” ang Metro Manila ug ubang bahin sa Luzon tungod sa pagbaha gumikan sa kusog ug kanunay nga pag-uwan nga dala sa habagat ug sa bag-o lang nga misibat nga bagyong Gener.

“It’s like a water world,” matod pa ni Undersecretary Benito Ramos, ang pangulo sa National Disaster Risk Reduction Management Council.

Ang Waterworld usa ka pelikula nga naghulagway sa paglunop sa tibuok kalibotan human sa pagkahilis ug paglanay sa mga polar ice caps, samtang uwan pa lang gani ang hinungdan sa lunop sa Metro Manila.

***

Sama sa naandan, ang mga kabos maoy labing apektado sa nahitabong lunop sa Metro Manila kay sila man ang katapusang namakwit gikan sa ilang mga panimalay ug mobalhin ngadto sa mas luwas nga mga evacuation centers.

Di nato sila mabasol kay ilang gibantayan ang labing gamay nilang butang nga ilang giilang mga bahandi.

Apan di angay nga kalimtan nga ang kinabuhi mao ang labing mahinungdanon sa tanan kay bisan ianod ang tanang butang mapalgan ra kini basta ang tawo buhi pa lang.

***

Sa paghubas sa dakong lunop sa kalibotan nga gihulagway sa Bibliya, nisaad ang Ginoo ngadto kang Noah ug sa iyang mga anak nga di na mapuo pag-usab ang tanang kinabuhi pinaagi sa mga tubig sa lunop ug wa na gyuy lunop sa kalibotan (Genesis 9:11).

Mao tingali kini ang gisaligan sa konseho sa dakbayan sa Sugbo sa dihang ilang gilaplapan ang proposed budget ni Cebu City Mayor Mike Rama alang sa pag-ayo sa drainage system sa syudad.

Busa, ayaw na lang kamog pangutana kon andam ba ang syudad sa susamang pagbaha didto sa Metro Manila ug ubang bahin sa Luzon.

***

Grabe ang nahitabong lunop sa Metro Manila nga bisan pa tingalig unsa kadagko ang ilang drainage system di makapiog sa gidaghanon sa tubig nga nibul-og unya layo pa ang mga bungtod nga ilang kadaganan.

Dinhi sa syudad, panahon niadtong “tsunami scare,” dalo kaayong nakasirit ang mga tawo paingon sa Barangay Busay ni Kapitan Yodie Sanchez.

Kon di kaayo dako ang baha, makadangop ka sa mga flyover ni kanhi kongresista Raul del Mar sa north district sa syudad.

Mahinungdanon una sa tanan ang kinabuhi sa tawo. Busa kadtong nanagpuyo daplin sa mga sapa kinahanglan mohiklin dayon kon kusog ug way puas ang uwan ug ilang mamatikdan nga nisaka na ang tubig sa sapa. Di na maghuwat pa nga sultian sa mga opisyales sa kagamhanan nga bakwit na.