Editoryal: Manila, Bulacan ug Marikina

HUMAN sa duha ka semanang pagsigi og uwan nga maoy hinungdan nga 60% porsiyento sa dapit sa Metro Manila ang naapektohan sa grabing baha nga mimugna og dakong kadaot, misubang na gyud ang adlaw sugod niadtong Huwebes nga maoy nakahupay sa mga molupyo nga nangaigo.

Ang dautang panahon nga mibubo og 300 mm nga average sa uwan sulod sa 11 ka adlaw gikatandi sa intensity sa topical storm “Ondoy” nga mikusokuso usab sa ubang dapit sa Metro Manila tulo ka tuig ang nakalabay.

Apan ang pagtandi dili lang kutob diha kon dili lakip na usab ang mga gidaghanon sa mga residente nga nangabiktima ug naapektohan.

Ang hinay apan hataas nga pagsigi og bunok sa uwan nakahatag og kahigayonan sa mga residente nga makabantay hinungdan nga aduna lay 60 ang mga nangamatay kon itandi sa Ondoy nga mikalas og 300 ka mga kinabuhi sa tawo.

Hinuon sama sa ilang nasinati sa “Ondoy” ang mga naapektuhan, sa gihapon, nag-atubang na usab og dakong bulohaton nga mao ang pagpahimuntar na usab og balik sa mga butang nga giguba sa baha.

Pero sa silingang dapit didto sa Bulacan, ang pagsaka sa tubig nagpadayon sa gihapon.

Mga residente nga nagdumili sa pagbiya sa ilang panimalay ang nangatanggong ug hapit na gani sila walay makaon.

Ngi-ob ang ilang kagabhion kay wala na man sab ang ilang sugang dagitabnon.

Sa Marikina City, mihinayhinay na man tuod og us-os ang lebel sa tubig apan naisyu karon didto kon nganong wa igkita ang mayor taliwala ning kalisdanan.

Si Mayor Del de Guzman ang gikataho nga atoa pa sa Amerika. Labing siguro kini masakyan sa iyang kontra sa pulitika sa umaabot piniliay.