Barrita: Kinsay obstructionist, kinsay anti-Cebu City?

KANSELAHON ni Rep. Tomas Osmena (Cebu City, south district) ang unom niya ka mga road concreting projects nga mokabat og P300 milyunes kay gisupak kini ni Mayor Mike Rama.

Naglakip kini sa pagsemento sa V. Rama Ave. ngadto sa Dona Modesta Gaisano St. balig P139.4 milyunes, Quijada St. ngadto sa Monterrazas Subdivision balig P41.7 milyunes ug M. Velez St. ngadto sa Singson St. balig P46.7 milyunes. Sementohon sab ang Tupas, Katipunan ug Tres de Abril.

Sa ato pa, nabaraw ni Mayor Rama si Kongresista Osmeña?

***

Ang pundo sa maong mga proyekto gikan sa tukuron unta nga flyover sa Salinas Drive, Lahug nga gibabagan sab ni Mayor Mike Rama, busa iyang gipa-realign sa Department of Public Works and Highways (DPWH) sa road concreting nga gisupak sab ni Rama.

Gisigig baraw sa mayor ang kongresista, mao nga gitawag ni Osmena si Rama nga usa ka “obstructionist.”

“He’s the only mayor who doesn’t want projects from the National Government. I do what I can to bring in projects and he doesn’t like. So, I will stop it. He cannot blame me for not getting funds for the city,” matod ni Osmeña.

***

Kon makanselar ang road concreting projects ni Kongresista Osmeña, ma-revert ang pundo alang niini ngadto sa panudlanan sa nasudnong kagamhanan.

Matod pa ni Osmeña, si Rama na lay papangitaon og pundo para sa iyang mga proyekto.

Daling nakatawag si Mayor Rama kang Osmena nga “anti-Cebu City” tungod sa pagdumili sa kongresista nga ma-realign kini sa laing mga proyekto.

Ang gisupak ni Rama mao nga sementohon ang karsada nga maayo pa nga daghan mang mga karsada nga gubaon ug kinahanglan ayuohon. Magamit sab unta ang maong pundo sa paghimog seawall nga manalipod sa nanagpuyo sa coastal areas gikan sa mga dagkong bawod.

***

Mao kini ang mahitabo kon ang mga opisyales di magka-uyon. Ang ato na lang madunggan nga ang kongresista mohingan sa mayor nga “obstructionist” samtang ang mayor motawag sa kongresista nga usa ka “anti-Cebu City.”

Ang politika mao ang hinungdan niini. Pero makita sab nato kon giunsa paggamit ang pundo sa gobyerno nga ayuhon ang karsada bisan maayo pa tungod lang kay naay pundo nga magamit. Nakakita na tingali mo sa mga karsada nga lig-on ug hapsay pa apan gisapawan og aspalto.

Mao kana ang ilang giingon nga ang mga politiko mopahimog tulay bisag way sapa, unya kon moreklamo ang mga tawo nga wa silay sapa, igo lang moingon, “Aw, di nato dunganon. Sa sunod na lang nang sapa.”