Editoryal: Hagit sa ASEAN

KON dili maghiusa ug walay tino nga posisyon ang Association of Southeast Asian Nations (ASEAN), ang tumong sa panaghugpong mahimong walay bili labi na sa importanteng isyu seguridad sa rehiyon.

Si Anifah Aman, ministro sa Foreign Affairs sa Malaysia, nagkanayon nga ang ASEAN kinahanglan nga mangita og solusyon sa ilang ‘overlapping’ nga pag-angkon sa mga isla sa Spratlys ug dunay hini­usang posisyon sa ilang pagharong sa China, dili sakop sa ASEAN ug miangkon sa tibuok Spratlys group of islands.

Mao kini ang komentaryo ni Aman human sa ilang panagtagbo sa iyang katugbang kang Yang Jiechi, ministro sa Foreign Affairs sa China nga nibisita sa Malaysia.

Ang sugyot ni Aman maoy labing tukmang lakang sa pagkakaron human sa nagkaagresibo nga lihok sa China sa pag-angkon sa Spratlys.

Ang Brunei, Malaysia, Pilipinas ug Vietnam, pulos sakop sa ASEAN, niangkon lang sa pipila ka isla nga gituhoang abunda sa mineralis apan, nagsapapaw, lakip sa Taiwan.

Pananglitan, ang tensyon tali sa China ug Pilipinas migrabe human sa standoff tali sa Pilipinas ug China bahin sa pagpanagat sa Scarborough Shoal sukad niadtong Hunyo.

“We are confident we can resolve this matter. China is also earnest in its desire in finding solutions...” matod ni Aman.

Kon ang China may intensyon sa malinawong kasulbaran, base sa pamahayag ni Aman, maayong mapahimuslan kini sa ASEAN aron dili matandog ang kahusay ug kalinaw sa rehiyon.