Nadela: Maminaw ta og tambag

NAKADAWAT ko og tawag gikan ni Atty. Yenyen Seno niadtong Bieyernes labot sa luwatang panahom ni Vice Ma­yor Al Arquillano nga nasinati sa Luzon.

Wala ko katambong sa press conference apan nadunggan nako sa mga report sa radyo ang subling panawagan sa bise mayor sa San Francisco, Camotes nga ang nahitabo sa Luzon bisan unsang orasa mahitabo kini dinhi sa ato kung di kita mohimo sa mga angay buhaton unsaon nga kini malikayan. Unsaon nga maminos minosan ang epekto sa grabing pag-ulan nga atong masinati matag karon og unya.

Ang tambag ni Vice Mayor Al angay nga seryusohon sa iyang mga kaubang opisyal sa gobyerno. Ang iyang giingon nga angayan nga mobubo og salapi ang mga lungsod ug dakbayan paghimo og mga lakang nga malikay sa baha ang ilang dapit mas maayo pa kay sa magkwenta mo og kadaut sa mga propyiyedad, inprastraktura, produktong agrikultura, og pinaka pait kung mag-ihap ta og mga patay nga nangligdas sa mga sityo og kabarangayan.

Kung di mo motoo og tambag, aw kamo gud.

Ang United Nations nipasi­dungog kang Vice Ma­yor Al tungod sa iyang mga programa labot sa epekto sa climate change. Vice Mayor Al, padayon sa imong nasugdan nga misyon, bahala na og di maminaw og tambag kanang uban.

PROYEKTO

DIDTO sa Metro Manila dunay opisyal nga gitangtang sa pwesto tungod sa baha.

Mga opisyal sa gobiyerno nahilam-os sa mga ataki sa media tungod gihapon sa baha. Nagbinasolay kay way gihimo nga mapugngan ang baha.

Angayan lang sab nga paninglan ni sila kay sila man ang gitahasan nga mohimo og mga lakang aron maimplimintar ang mga programa pagbatok sa baha. Way sagol komedya panahon na siguro nga ang gobyerno motukod og departamento nga ang trabaho pagsulbad sa baha ug pag-implimintar og mga prog­rama nga ang dapit nga wala pa mabahai, malikay sa puwerhisyo.

Kung mangutana mo kung asa og kwarta ang gobyerno nga gastuhon ning maong departamento, i-realign ang ubang pundo nga wala pa magamit.Dunay mga proyekto nga wala gyu’y hinungdan unya kadudahan kaayo kay unyag kahuman magbag-o na sab og sakyanan ang mga buayang opisyal.