Nalzaro: Manglimpiyo usa ang simbahan

GAWAS nga ilang i-blacklist ug dili pa butaran ang mga pulitiko nga mosuporta sa kontrobersiyal nga Reproductive Health Bill, mibahad usab ang kadagkuan sa Simbahang Kat­oliko nga ilang hukasan ug pa-esplikahon kadtong mga pulitiko nga buwag o mi-abandonar sa ilang pamilya kon gi unsa nila pag­tratar ang ilang mga asawa ug mga anak. Pastilan alang kanako, morag personal naman kaayo kining gihimo sa simbahan kon ila kining himuon.

Unsa may labot intawon sa pribadong kinabuhi sa mga pulitiko? Matod pa nila, walay labot ang lungsod ana sa ilang personal nga kinabuhi. Una, nganong himuon man kini sa taga simbahan? Kay gusto nilang mositar og moral standards sa mga gustong magpapili og public office? Kon mositar sila og moral standards, walay mapili anang mga pulitiko. Sa kurapsiyon lang daan, hagbong na ang kadaghanan.

Limpiyuhan

Buot bang ipasabot sa simbahan nga ilang hashasan ang mga pulitiko nga broken family? Bisan kadtong mga nagpa-anular sa ilang kasal kay makonsiderar man gihapon nato kana nga broken family bisan kon legal ang annulment o legal separation. Aw, mo-isplikar ani sila si Senator Chiz Escudero, Koko Pimentel, Pia Cayetano ug Loren Legarda, kansang kaminyuon na-anular. Unya ang mga artista nga mga senador nga daghan og kulukadidang sama nila ni Lito Lapid, Bong Revilla ug Jinggoy Estrada, mokompisal ba usab sa ilang extra marital affair.

Aw, kon mao kanang kalakiha atong ipa-apil sila si Mayor Mike Rama, Gov. Gwen Garcia ug Kong. Pablo John Garcia kon nganong nagpa-anular sab sila. Para nako morag dili na kini ang direksiyon sa taga simbahan. Morag personalan na kining ilang gihimo. Sa dili pa unta sila manghilabot sa personal nga kinabuhi sa mga pulitiko sa isyo sa moralidad, ila unta nga una­hon sa paglimpyo ang ilang kaugalingon nga organisasyon. Sus, pagkadaghan dihang salawayon.

Disiplina

Unsa may ilang gihimo anang mga pari nga adunay mga live in partner ug adunay mga anak? Kanang mga pari nga mga mahuyang o mga bayot ug kadtong nangawkaw sa kuwarta sa simbahan? Kadtong mga pari nga buhong sa paggamit sa ilang kita sa simbahan? Wala man gani sila makadisiplina sa mga pari sa Minglanilla parish nga giprotestahan mismo sa ilang mga parokyano gumikan sa mga immoral nga kalihukan. Manilhig usa sila sa ilang tugkaran sa dili pa sila manghilabot sa kinabuhi sa uban. Amen.

(bobby.nalzaro@yahoo.com)