Editoryal: Inside job

KON tinuod man gani ni, lisod tuohan nga way nalambigit nga inside job kining kontrobersiyal nga pagpasulod sa usa ka babaye sa Cebu Provincial Detention and Rehabilitation Center (CPDRC) ug gihimong prostitute ngadto sa mga binilanggo.

Ang maong babaye gi-recruit gikan sa General Santos City pero nganong yano ra man kaayo siyang nakakuha og conjugal ID nga wa man kaha siyay bana o kapuyo nga napriso diha sa CPDRC?

Sukwaot kaayong paminawon nga maglisod man gani kadtong mga lehitimong mobisita sa mga binilanggo pagsulod tungod sa ka estrikto sa mga guwardiya unya malutsan na hinuon sila og usa ka babaye nga way kaila sa sud?

Taga Gensan City sa ato pa di siya suheto dinhi sa Sugbo, ug kon nganong naabot siya sa CPDRC natural lang madudahan nga aduna gyuy naggiya kaniya.

Kon kinsa man ang nagpasiugda niini kinahanglan masilutan gilayon sa madaling panahon.

Gikan sa mga guwardiya ngadto na sa jail warden ang angay ipaubos sa makuting imbestigasyon.

Si Jose Ma. Gastardo kinsa maoy consultant on jail matters sa province, mihimakak nga adunay prostitusyon sa CPDRC bisan pa man og duna nay nireklamo.

Matod ni Gastardo, ang babaye kapuyo sa usa sa mga piniriso sulod sa 13 ka tuig.

Ingon niya nga ang maong babaye nakasulod sa bilanggoan tungod kay nisunod man kini sa legal nga mga proseso. Aduna usab kini saktong rekisitos.

Ang pamahayag ni Gastardo nakadugang na hinuon sa pagduda nga adunay inside job sa maong hitabo. Nganong nasuweto man siya sa mga rekisitos nga taga Gensan man unta siya?

Dili isyu kon giunsa pagsud sa babaye ang CPDRC kon dili angay tubagon nila kon kinsa ang nagdala ug naggiya kaniya sa pagpasulod?