Durano: Walay budget

MIKARANSA pag maayo si Commission on Elections Chairman Sixto Brilliantes sa gihimong paglaslas ni Department of Budget and Management Secretary Florencio Butch Abad sa ilang pundo alang sa sunod tuig nga gibinlan na lamang og P8 bilyunes gikan sa orihinal nila nga gipangayong 24 Bilyunes.

Gani, mihulga pa si Brilliante sa pagluwat sa iyang katungdanan kay niya pa nga dili mapaigo ang maong gahin sa usa ka election year diin ang gamiton mao pa gyud ang election automation ug dili ang mano-manu nga proseso.

Ning bag-o, nadiskobrehan sa mga senador atol gihimong budget deliberations sa Senate Committee on Finance ang di matukib nga mga gasto alang sa kapritso ning maong ahensiya sa gobyerno.

Diin gigahinan og P21 milyunes ang honoraria sa mga mopahigayon sa overseas voting.

Unya tungod sa kadako sa sobra, nakitan-an nga apil diay ang mga junkets sa suroy-suroy gawas sa nasud nga sagad ra usab nga mga miyembro sa pamilya sa mga tag-as nga opisyales.

Gikarga pag-apil ang pagpalit og bag-ong mga katre alang sa ilang summer cottages diin ang matag king size bed ang mokantidad og P91,000 ang matag usa samtang ang queen size bed tag P84,000 usab ang matag bu-ok.

Adunay dining set nga tag P78 mil; tulo ka reception tables nga tag P15 mil ang usa; 30 ka accent chairs with armrests nga tag P17 mil ang usa; 3 ka living room sets nga tag P59 mil ang usa; blinds nga tag P340 mil ug kurtina nga tag P694 mil. Kini ang gipun-an pa sa laing P7 milyunes alang sa pagpalit og bag-ong mga vehicles diin nahilakip ang bag-ong Toyota Camry nga service ni Brilliantes.

Dinhi dili kalikayan ang pagtumaw sa billion pesos worth nga pangutana alang kang Brilliantes ug sa iyang mga alipores: nganong sige man sila og tiyabaw nga wala sila’y budget? Nga diay, mao ma’y ilang gi-una sa pagtagbaw ang ilang kaugalingong mga kapritso.

Ang nakaparat kay gihurot sa pagpilde sa Comelec ang tanang mga recall elections lukop nasud nga gipiyungan ang mga balidong hinungdan kay mao gyu’y ilang gipatigbabaw nga ang ilang ahensiya wala gyu’y budget.

Ang pag-una sa personal nga katagbawan labaw sa pagbuhat sa opisyal nga katungdanan, tilimad-on sa trabaho sa mga opisyal sa gobyerno nga wala’y hinungdan. Maayo tingaleng dili na magpapugong ug moluwat na pagdiretso si Brillantes sa iyang gihuptang puwesto.

Hinuon kana ang mahimo lang nga posible ug kon may nahibilin pang uwaw diha sa iyang pagkatawo.