Editoryal: Kabilin ni Robredo

HUMAN sa duha ka adlaw nga gihugtan nga search and rescue operations dihang nahagsa ang abyon nga Piper Seneca, si Interior Secretary Jesse Robredo napalgan nga patay na kagahapon sa buntag.

Lakip sa nakita nga patay na sa cockpit sa abyon mao ang duha ka mga piloto, Captain Jessup Bahin­ting ug Nepalese flight student Kshitiz Chand. Apan, unang naugkat ang lawas ni Robredo human daling kini makuha isip pasahero.

Natuldokan ang paglaom sa pamilya ug mga higala sa kahilim uban sa duha ka mga piloto human nakompirmar kining patay na. Nasubo ang nasod nga gipanguhan ni Presidente Benigno Aquino III, kinsa daan nang emosyonal sa trahedya sa iyang suod ug sinaligan nga sakop sa iyang Kabinete.

Mga pagyukbo ug pagdayeg sa bugtong tinahod ug labing maayo nga sakop sa Kabinete ni PNoy, kinsa nakadawat og daghang pasidungog gikan sa lokal ug international award-giving body, isip kanhi mayor sa dak­bayan sa Naga sa Bicol.

Si Robredo nagbilin og maayong mithi ug ehemplo sa matuod nga alagad sa katawhan ug naghatag og pag­laom nga dili damgo ang tinguha sa paghimo nga limpiyo ug sihag nga pagdumala sa kagamhanan taliwa sa daghang kontrobersya ug korapsyon nga naghimong alaut sa nasod.

Daghang nadasig sa mga pagtulun-an ni Robredo ug manghinaot kita nga mogawas ug mobarog aron pagpadayon sa nasugdan nga kabag-ohan sa pagduma­la sa gobiyerno nga maghatod sa nasod ngadto sa malahutayong kalamboan.

Makapamalandong kita -- kasayo gikuha sa Magbubuhat ang tawo nga dako pa og matabang sa katawhan isip taas nga opisyal sa kagamhanan. Dili kaha gilikay lang siya aron dili masuyop sa mga tawo sa iyang palibot nga nagdaut sa sistema sa kagamhanan?