Lariosa: Pagkaplag kang Robredo

KAGAHAPON sa may 9:00 sa buntag nakaplagan na gayud ang patayng lawas ni Department of Interior and Local Gevwernment (DILG) Secretary Jesse Robredo human sa tulo ka adlawng pagpangita sa kadagatan sa Masbate.

Sa pagsuwat ning maong lindog haw-ason pa ang lawas ni Robredo nga nailhan sa iyang staff. Sila si PNoy ug Kalihim Mar Roxas sa DOTC nga nangunay sa pagpangita dako ang kasagmuyo.

Si PNoy angay gyung mawili kang Robredo kay kini usa sa iyang sinaligang kalihim. Gawas pa, kini maligdong nga way mansa sa iyang karong pangatungdanan nagsubay sa matuwid na daan ni PNoy.

Si Robredo usik kaayo nga opisyal sa gabinete ni PNoy. Usa ka lig-ong materyal pagka senador o kaha pagka pamuno sa atong nasod. Nakita nga siya usa ka madungganon nga public servant

Usa siya ka Ramon Magsaysay awardee sa public governance samtang mayor pa sa Naga City. Lingkod Bayan Awardees a Civil Service Commission. Nahimong usa sa Ten Outstanding Young Men of the Philippines (TOYM) .

Gipili sad siya nga usa sa Ten Outstanding Persons of the World tungod sa iyang liderato nga nakahimo sa Naga City isip nag-unang siyudad sa Pilipinas. Ang iyang masteral degrees in Public Management nakuha niya sa Harvard ug Cambridge universities.

Nagpasabot nga kadto si Robredo di kaamang-amangan ug masayon-sayon kon katakos ang hisgutan. Wa masayop ang Pamuno sa pagkuha niya nga Kalihim sa Dept. of Interior & Local Government.

Nagpahibawo kadto siya nga modagan pagka senador sa 2013. Maglayag unta to ang iyang kadaugan kon wa pa ang sayo niyang kamatayon. Layo ra unta kayo kanang mga kandidato nga nagsalig lang sa ngalan sa pamilya.

Mga iladong bansagon sama sa Enrile, Tanada, Angara, Villar ug uban pa kansang kaliwat modagan pagka senador. Kadaghanan kanila way mga katakos nada lang gyud sa kabantog ug ngalan sa pamilya.

Ang mga kandidato unta sa hataas nga posisyon sama sa kongresista, gobernador ug senador aduna untay abilidad, talento ug katakos di kay magsalig lang sa ngalan sa pamilya. Pagkadaghan dinhi baya sa Sugbo.

Tinuod nga usik kaayo si Robredo. Apan giingon man gud nga ang buotan maoy unahon pagkuha sa Ginuo. Ang masamong damo dugay . Busa antuson na lang nato kining mga kurakot nga mga opisyal nga dugayng mamatay.

Sayri Kini. Niadtong Sabado sa Emall Food Court sa may alas 11:30-12 Noon nabiyaan nako ang libro nga “Hidden Lies.” Palihog iuli ngari nako o sa Sun.Star Superbalita.

Libro kadto sa mga sugilanong gisuwat sa duha ka foreign authors. Please, iuli lang!