Lonzon: LP masulub-on karon

LAWOM diay kaayo ang dagat nga nahagsaan sa eroplano didto sa Masbate. Kay kagahapon pa sa buntag nakaplagan ang patayng lawas ni Department of Interior Local Government Secretary (DILG) Jesse Robredo sa gihimong search and rescue operation.

Si Robredo, kauban sa pilot nga si Captain Jessup Bahinting, co-pilot Kshitz Chand ug Capt.Gil Abrazado, aide ni Robredo. Naluwas si Abrazado sa mga mananagat human natangtang ang seat belt niini sa eroplano.

Ang mga biktima giila nga mga maa­yong tawo ug dunay mga maayong nahimo ngadto sa katawhan. Si Robredo, maoy responsable sa maayong pagpadagan ug pagtabang sa local government units.

Samtang gawas sa pagka pastor ni Bahinting, nga nakatabang sa pagsabwag sa mga maayong pulong sa Diyos ginamit ang bibliya ug anaa kini kanunay alang sa pagtabang sa mga biktima sa kalamidad ginamit ang iyang eroplano alang sa mga relief operation.

Ang co-pilot nga si Chand, nga usa ka batan-on sama sab tingali og panglantaw ni Bahinting nga dunay gugma sa pagtabang tungod sa impluwensya. Maayo unta nga magdaghan ang mga tawo nga sama kanila. Subo lang kaayo palandungon kay ang mga maayong tawo mao may sayong mopanaw.

Subay niini miduyog ang kadagkoan sa Liberal Party (LP) ilabi na gyud dinhi sa Sugbo, sa masulob-ong pamilya ni Robredo. Apan ang tan-aw sa uban, lahi ang ilang interes sa pagpaduol ni Robredo, sa dihang buhi pa kini tungod sa ilang interes sa pulitika.

Di malalis ilang gigamit si Robredo, tungod sa kahalapad sa gahum sama sa pagpasuspenso ug opisyal sa gobyerno. Ang nadawat nakong kasayuran ilang gi-pressure ang kalihim sa pagpasuspenso na ni Gobernador Gwen Garcia, kay kun ang Sandiganba­yan ang paabuton dugay pa kaayo.

Mao ni ang angayang hinuktukan sa taga LP hilabi na gyud ang madinumtanon ug maginukdanon nga si Kongresista Tomas Osmena sa Cebu City south district nga; di gyud maayo ang magplano ug di maayo sa atong isig katawo kay masuko ang kahitas-an.

Gani gipikhan sab ni Tomas si Bahin­ting nga way salig sa mga eroplano niining gipanag-iya. Pagka arogante gyud niining tawhana. Para man gud niya nga siya ra gyud ang kasaligan ug maayong lake?

Subay niini, nanawagan si Atty. Totol Batuhan, kanhi Usec sa Department of Transportation and Communication (DOTC), alang sa paghulma ug transportation safety board nga pagalangkuban sa mga eksperto alang sa technical ug legal background.

Sa tuyo aron himuon ang halapad nga imbestigasyon sa mga transport accidents-air, maritime o land/rail. Ug pagrekomendar og mga lakang aron malikayan ang sobleng mga trahedya.

BENHUR HEALTH CARD

Naa say Mayor Junie Martinez, sa siyudad sa Bogo, binoangan ang mga pobre diha sa ikaupat nga distrito ginamit ang iyang mga tawo aron ipahibawo nga peke ang Benhur health card. Mao nga dunay uban di sab gyud mokuha kay usik lang kuno ang ilang panahon kay nakadungog sa radyo.

Kini nagpakita lang kun unsa ka iresponsable kining tawhana. Gipalabi ni Martinez ang iyang kasuko ni Kongresista Benhur Salimbangon tungod sa interes sa pulitika.

Kon mahimo, isalikway lang unta ang pulitika ug tabangan nga di binoangan ang mga pobre . Nasayod nga si Martinez nga ang matag kongresista di lang dinhi sa Sugbo, apil na tibuok Pilipinas ang nagahin ug pundo alang sa health card. Unsa man, dika mahadlok og gaba?

Para nako, bahala na og magpinaakay sa dunggan ug magbugno ang mga pulitiko basta ayaw lang gyud intawon isakripisyo ang panginahangan sa mga kabus. efren_lonzon@yahoo.com; 09164214888 Sun 09327380888