Editoryal: Alang sa unsa pa man?

HUMAN mabutyag nga wa pa diay ma-confirmed sa Commission on Appointment (CA) ang pagkatudlo ni anghing Jesse Robredo isip Secretary sa Department of Interior and Local Government (DILG), nagtinudloay dayon og si kinsa ang angay nga basulon kalabot niini.

Unang naigo sa pagbasol mao ra pud ang uyoan ni Robredo nga si Camarines Sur 3rd district Rep. Luiz Villafuerte Sr. kinsa gialegahan nga maoy nagbabag sa confirmation ni Robredo.

Apan kini hugot nga gipamakak ni Villafuerte kinsa nagkanayon nga way opisyal nga nibabag sa appointment ni Robredo kay wa pa gyud kini mapresentar sa council.

Ingon ni Villafuerte nga way nibabag pero dunay reklamo nga nadawat ang secretariat nga kinahanglan pa nga imbestigahon.

Naduhig ang pangalan ni Villafuerte kalabot niini tungod kay sa sayo pa giingon man nga dunay pa­nagbingkil ang duha. Ang anak ni Villafuerte nahimo gani nga kaatbang ni Robredo sa pulitika.

Pastilan no. Kadugay na ni Robredo nga naghimo sa iyang mga bulohaton isip DILG chief unya wa pa diay confirmation.

Karon nga nitaliwan na si Robredo dunay plano nga mopahigayon og posthumous
confirmation ang senado alang kaniya.

Siguradong wa na gyuy mobabag, pero unsa may katuyoan nga himuon pa man kini? Kinsa may modawat sa confirmation?

Pagkasalikwaot paminawon. Niadtong buhi pa ug aktibo kaayo si Robredo sa iyang mga gimbuhaton wa gyud nila hatagi gilayon og pagtagad, pero karon nga patay na si Robredo dali ra man lagi nilang ipa-confirmed.

Apan daw sa wa na ni kinahanglana kay alang ni Robredo, di niya prayoridad ang titulo kay iyang gipalabi ang tinud-anay nga serbisyo.