Barrita: Kinsay ihulip kang Secretary Robredo?

Eddie O. Barrita
Tikdul-tikdol

WA PA gani malubong si Secretary Jesse Robredo, nga namatay sa pagkahagsa sa eroplanong iyang gisakyan, uban sa piloto nga si Capt. Jessup Bahinting ug sa iyang co-pilot, gikahinaman na kon si kinsay ihulip kaniya sa Department of Interior and Local Government (DILG).

Si Kongresista Arlene Bag-ao, usa ka sakop sa pundok nga Kaya Natin, diin si Robredo usa ka co-founder, niingong nga ang ihulip ni Robredo kinahanglang efficient, effective ug values-oriented.

Matod pa ni Bag-ao, di morekomendar ang Kaya Natin og kinsay mohulip kang Robredo, apan kon si kinsa man gani, kinahanglang susama og mga prin­sip­yo ni Robredo.

***

Si Manila Auxiliary Bishop Broderick Pabillo, chairman sa Catholic Bishops’ Conference of the Philippines National Secretariat for Social Action, niingon nga dakong hagit sa Malacanang ang pagpangitag tawo nga pareha og performance ni Secretary Robredo.

Samtang si Archbishop Emeritus Oscar Cruz, nga kauban ni Robredo sa kampanya sa pagsumpo sa sugal nga jueteng, niingon nga ang mosunod kang Robredo mahinungdanon sa matuwid na daan ni Presidente Noynoy Aquino.

***

Apan di masayon ang paghulip kang Secretary Robredo. Atong subayon ang iyang lang mga pasidu­ngog nga nadawat bahin sa local governance.

Gipakita ni Robredo ang iyang abilidad ug katakos sadihang napili ug nag-alagad siya isip mayor sa syudad sa Naga didto sa Bicol.

Tungod sa iyang maayong performance nga sama sa milagro nga maoy nakapabangon sa syudad sa Naga, nakatigom siyag kapin sa 140 regional, national and international awards ug sa labing bug-at sa tanan, ang Ramon Magsaysay Award for Government Service sa tuig 2000.

Sumala pa sa prinsipyo ni Robredo, di paigo nga makamao ang usa ka opisyal kay di tanang makamao tarong ug labing pang di tanang tarong makamao.

***

Apan atong mapaabot nga kontrolahon gihapon sa Liberal Party ang DILG kay mao kini ang ahensya sa gobyerno nga dunay control sa mga local nga kagamhanan ingon man sa kapulisan.

Lakip sa gihugon-hugon nga ihulip kang Robredo mao sila si Cavite Rep. Joseph E.A. Abaya, kanhi Isabela Gov. Grace Padaca, Manila Mayor Alfredo Lim ug Davao City Vice Mayor Rodrigo Duterte, mga lider sa LP.

Dunay laing gihugon-hugon nga ihulip kang Robredo apan di sakop sa LP - si Senador Ping Lacson. Malingaw ang mga pulis niini kay kon mahinumdom mo, si Ping Lacson samtang siya pay hepe sa Philippine National Police, maoy nimando nga kinahanglang 34 inches ang hawak sa mga pulis.