Durano: Kontra-Enganyo

TUYO nga gipasar ang Republic Act 7305 kun ang Magna Carta of Public Health Workers aron madasig ug ma-enganyo ang mga anaa sa medical profession sa pagserbisyo sa atong mga kadugo sa kalungsuran imbis nga manglalin ngadto sa laing kanasuran.

Ubos sa maong balaud, ang mga health workers ang gihatagan og subsistence allowance, longevity pay, laundry allowance ug hazard pay gawas sa regular nga suhulan nga ilang madawat matag bulan.

Apan imbis nga ipatuman, gihimo na hinuong contractual ang tanang mga nanerbisyo sa panglawas sa atong kaigsoonan sa lalawigan ubos sa administrasyun ni Gobernadora Gwendolyn Garcia.

Kini ang iyang gibuhat ubos sa katarungan nga siya nagatoo nga ang gobyerno gikinahanglang padaganon susama sa private enterprise aron makahatag kini og efficient og effective service ngadto sa publiko.

Ubos ning maong sistema, ang mga health workers wala na’y security of tenure, kaltasan pa ang suweldo sa employment agency unya gitambog pa gyud sa kalimot ang mga benipisyo nga unta gitagana sa balaud alang kanila.

Unya sukwahi sa gipaburot nga burit, kasagaran sa mga nag-antos sa pagtrabaho sa mga district hospitals ang mihimo lamang sa ingun aron makabaton og work experience.

Sarang nga ilang magamit sa pag-apply ug matawag nga gainful employment sa mga urban centers o ba kaha sa mga hospital sa gawas sa nasud nga makiangayong mohatag og suweldo ug mga benipesyo.

Ang mas nakaparat kay dili lamang ang mga health workers ang mga nag-antos kondili ang kinabag-an sa mga yanong probinsyano ang mahadlok na usab magpakunsulta bisan og aduna sila’y mga gipamati nga sakit o balatian sa panglawas tungod sa nagtangag naman og bayad ang ilang pagpa-eksamin.

Dili usab modagan ang ambulansya kon dili mabayran daan ang panggasolina ug honorarium sa driver unya wala usa’y nurse o paramedics nga mo-uban sa ambulansya aron mo-atiman sa kritikal nga pasyente kay wala kini maapil sa gibayran nga kontrata sa probinsya.

Taliwa ning maong kontra engganyo nga pamaagi, padayon ang pagbuhagay sa panghambog sa Kapitolyo nga ang atong Sugbo ang labing datu kay aduna kini’y 2.3 Bilyunes sa 2011 ug may surplus nga 700 milyunes sa ilang kaban.

Apan unsa may pulos ning maong pundo kon sa katapusan, wala kini mapahimusli sa atong katawhan kay susama sa mutya kini ang ipa-ibog ibog lang sa mga tagdumala?