Nalzaro: Bisan patay gipamulitika

DAGHAN ang na-anugnan sa kalit nga kamatayon ni Interior and Local Governments Sec. Jesse Robredo. Gani puro dayeg ang atong nabati gikan sa mga tawo nga suod sa namatay’ng Ca­binet secretary. Pero ingon ana man gyud na basta mamatay ang tanang positibong gawi o binuhatan sa namatay maoy ato nga mabati. Bisan man gani ang mga sakop sa Commission on Appointments wala nay mangangkon nganong wala dayon ma-confirm si Robredo bisan pa man sa impresibong mga kasinatian ug record niini.

Karon gusto na nilang ikonpirmar bisan patay na. Para sa unsa pa man? Ang mga politiko dali usab kaayong nakasakay sa kamatayon ni Robredo. Daghan ang gustong ma-starring.

Si Kong. Tomas Osmeña miadto sa Masbate niadtong Dominggo aron motabang sa rescue operation ni Robredo. Sakay siya sa usa ka private plane. Apan samtang didto siya sa Masbate airport, gipapahawa siya sa mga sakop sa Presidential Security Group (PSG) nga maoy mi-take over sa security sa airport kay gikatakdang moabot si Pres. Noynoy Aquino. Miulbo ang kaspa ni Tomas. Wala siguro siya mailhi sa taga PSG.

UNSAY MAHIMO

Gipabuhagay ni Kong. Osmeña ang iyang reklamo batok sa taga PSG atol sa budget hearing
sa Department of National Defense diin iyang gikomprontasi si Sec. Voltaire Gazmin.

Naunsa baya si Tomas? Unsa man pod ang iyang himoon didto? Moapil siya sa search and rescue operation? Maglisod na man gani siya sa iyang panglawas unya mag-apil-apil pa.

Nag­samok-samok lang siya didto. Publisidad lang ang iyang gitinguha. Porbida ning mga politiko bisan patay sakyan sa politika.

Gisaway pa ni Tomas si Noynoy kay nganong nangunay sa pagpangulo sa rescue operation.

Dili na kuno unta angayan nga moadto ang Presidente ug iya na lang untang isalig sa iyang mga tawo. Nganong dili god tawon mangunay si PNoy?

Iyang Cabinet member ang nadisgrasya. Alter ego na sa Presidente busa magpakabana gyud ang Presidente. Kon wala pa magpakita si PNoy didto sa crash site, ato usab nga sawayon gihapon. Si Tomas maoy walay katungod moadto.

MOPULI

Daghan ang mga misugyot nga gikinahanglan nga ang ipuli kang Robredo susama kaniya og kalidad. Pero imposible kining mahitabo gumikan kay lahi og kalidad ingon man performance. Adunay mga hugon-hugon nga si Sen. Panfilo Lacson. Na. Kon si Lacson ang mopuli, dilikado ang mga pulis.

Kadtong mga dagkog tiyan nga mga polis magbantay gyud kay istrikto kaayo si Lacson sa lawas sa mga pulis. Sapsapan gyud nang inyong tiyan. Posible sab nga si DOTC Sec. Mar Roxas mao ang ipuli sa DILG.

(bobby.nalzaro@yahoo.com)