Durano: ‘Veritas’

GIPATIK sa mismong edipesyo sa Harvard University ang pulong “veritas” kun kamatuoran.

Kini ang nagpamatuod sa mithi sa maong institusyon sa edukasyon sa pag-ugmad sa kaalam aron kini ang mamahimo unyang kahimanan alang sa pagtugkad sa matuod sa bisan unsang aspeto sa kinabuhi ubos sa landong sa kinatibuk-ang uniberso.

Bantugan kaayo ang maong eskwelahan kay gani mismong mga Kano ang dili makayano-yanong makatungha dinhi kay gi­kinanahanglan man ang hataas nga salabutan aron makapasar sa admission exams.

Gawas pa og wala kay scholarship, tinud-anay nga makalilisang gyud ang kamahal sa tuition. Hinungdan nga mangita na lamang og mas bubarato nga alternatibo ang kadaghanan.

Mao nga tinamod ug tinahod gyud ang mga produkto ning maong tulunghaan dili lamang sa Estados Unidos kon dili hilabi na gyud dinhi sa atong nasud sa Pilipinas.

Usa sa bulahan nga nakatungha sa Harvard University nga atong kaliwat nga Bisaya mao si Konsehal Rodrigo Bebot Abellanosa. Posibleng nga ang iyang wala’y kinutubang pasyon sa pagpangita sa kamatuuran gamit ang edukasyon nga iyang nakat-unan sa Harvard ang nagsilbeng iyang inspirasyon aron mag-ugmad sa iyang kaugalingong tulunghaan nga Asian College of Technology.

Dinhi nuon ning maong eskwelahan, dili angayang mabalaka ang mga estudyante kay anaa man si Konsehal Abellanosa nga andam og tagana nga mo-agak og mosapupo sa panginahanglan sa ilang mga produkto gikan sa enrollment paingon na sa ilang
pagpanrabaho.

Iya usab nga gihimong world class ang kalibre sa pagpanudlo sa maabot kaayo nga presyo. Mao nga bisan og dili na makatungtong pa sa Harvard University, garantisado na kaayo nga competitive na gyud ang ilang graduates ug mahimo na nga makig-indigay sa bisan kinsang mga produkto sa mga nag-unang tulunghaan sa kalibutan.

Ang dili lang nako masabtan kay sa dihang gipangutana sa mga taga NUSP (National Union of Students of the Philippines) ug CEGP (College Editors Guild of the Philippines) pwerte mang nakakaransa ni Bebot og dali kaayo nga nakapamasangil nga ang maong mga pundok sa mga estudyante ang nagsamok-samok kay posibleng nagamit na alang sa pamulitika.

Matud pa sa atong mga katiguwangan, nga ang marka sa edukadong tawo anaa makita sa iyang gibuhat ug dili diha sa iyang pagarpar. Hinaut pa nga imbis kalisangan ni Bebot ang kamatuuran, iyang ipatigbabaw ang espiritu sa veritas sa Harvard University.

Kay sa pagkatinood, wala’y angayang kahadlukan ang tawo nga wala’y gitaguan.