Nalzaro: Tomas wa manguwartakay nagsalig ni Minnie?

NUNOT niining pagpasaka og kaso ni Mayor Michael Rama batok ni Kong. Tomas Osmeña, dinhi na masukod ang abili­dad niining buhatan sa Ombudsman kon unsa kini sila ka tarong nga mo-imbestigar og mga anomaliya sa mga tag-as nga mga opisyal sa gobiyerno.

Si Rama pormal nang misang-at og reklamo batok kang Tomas nunot sa pagdawat ug paggamit sa kongresista sa duha ka mga sakyanan nga ihatag unta sa Bigfoot Company ngadto sa kagamhanan sa dakbayan niadtong talitapos na ang termino ni Tomas isip mayor.

Apan wala kini gidayon sa paghatag inay gigamit personal ni Osmeña. Gibutangan pa og seal sa Cebu City government ug aduna pay marka nga “police.” Unya karon kay nabuking naman, giingon ni Tomas nga gipalit sa iyang adunahang igsoon nga si Minnie Osmeña ang maong nga sakyanan. Kadudahan ang mga rason ni Tomas. Ngano man god uroy nga mopalit si Minnie og mga second hand nga mga sakyanan. Unya wala pa na siya magpermanente diri. Pero ang usa, base sa mga papeles sa LTO, gipanag-iya diay sa anak ni Minnie nga si Paulo Osmeña Jacinto. Wala magkadimao ang depensa ni Tomas.

AKSIYON

Aber, tan-awon nato ning Ombudsman. Maayo man sila manggukod og mga gagmay nga mga empleyado sa gobiyerno nga nakahimo og kalapasan. Kini kongresista na gyud ang ilang paga-atubangon. Basin baya og mokakak sila ani? Pero kadyot lang, aduna na bay igong ebi­densiya si Mike batok ni Tomas? Kuyaw ra ba og salida si Mike kay dramatic kaayo ang iyang pagkiha. Basin og mga newspaper clippings ang iyang gisukip sa iyang reklamo? Maayo gyud nga naay lig-on nga ebidensiya para masiyakoy gyud na si Tomas.

Migawas ra ba ang pagka-arogante. Nanghagit na nga ipakiha siya. Aw, gikiha na gyud ka tuod.

Maayo gyud ning adunay opisyal nga complainant aron ma-pressure ang Ombudsman sa pagdali sa im­bestigasyon. Kay kon wala god, magmika lang na sila. Abtan tag siyam-siyam. Maayo man ni si Mike kay makahudlat man sa Ombudsman unya pun-an pa sa follow up sa media, aw, mapugos gyud sila. Maka-ayo baya pod ning imbestigahan aron masuta kon aduna bay nalapas si Tomas nga balaod nunot ning iyang pagdawat ug paggamit sa maong mga sakyanan.

SANDIG NI MENNIE

Matag panahon nga adunay mokuwestiyon sa ba­handi ni Tomas labi pa. Ing iyang pagpa-opera og pagpatambal sa gawas sa nasud, kining iyang grabeng gasto sa matag eleksiyon, anha dayon kini siya mosandig ni Minnie. Aron ba ingnon nga pobre gihapon siya og wala siya manguwarta sa iyang katungdanan. Asa ka wala manguwarta? Dili man ta makakuwestiyon kay adunahan man na si Minnie. Pero si Tomas, P5 million ra ang net worth pero maka-afford ngadto nganhi sa Estados Unidos. Karong bag-o iyang gidala ang iyang grupo sa BOPK sa Boracay. Diin man siya og kuwarta?

(bobby.nalzaro@yahoo.com)