Editoryal: Abuso sa titser

GIIMBESTIGAR sa Commission on Human Rights (CHR) ang giingong pagpakaon og papel sa iyang mga tinun-an sa usa ka maestra sa Paknaan National High School tungod sa kalangas.

Dunay uban nga way laing nahimo, gipangtulon na lang nila ang mga papel sumala sa pagmando sa maestra. Gikatahong giangkon kini sa maestra ngadto sa principal.

Karong panahuna nga nahibawo na ang kinabag-an sa balaud batok sa pangabuso sa kabataan, naa pa gyud diay mga magtutudlo nga di mahadlok sa pagsilot og grabe sa ilang mga tinun-an.

Daghan man ang paagi sa pagpanton sa mga tinun-an nga di na kinahanglan pang silutan o pakauwawan sa kadaghanan. Pananglitan, minusan ang score sa test matag higayon nga maglangas. O kaha hatagan og butang nga makuptan unya kon katapusang makakupot, pabayron ug ang kuwarta ibutang isip class fund.

Pipila lang ni sa mga paagi nga yano aron pagdisiplina sa mga bata nga di kuyaw nga ang magtutudlo maakusahang nangabuso.

Mas maayo pang ipailawom sa Department of Education (DepEd) og anger management sessions ning mga maestrang dali masuko ug init og ulo. Kay ang maestrang maldita di na epektibo sa pagtudlo.

Kinsa man nga tinun-an ang makakat-on kon matag sulod niya sa klase ang kamangtas sa magtutudlo ang naa kanunay sa iyang huna-huna, di ang leksyon nga gitudlo?