Barrita: Managlahing baruganan sa citizenship ni Senador Poe

SA nagpadayon nga hearing sa Korte Suprema mahitungod sa pangutana kon usa ba ka natural-born Filipino citizen si Senador Grace Poe, mitumaw ang duha ka managlahing huna-huna sa mga mahistrado. Dunay mga sakop sa Labawng Hukmanan nga pabor kang Poe, samtang dunay sukwahi ang baruganan.

Si Supreme Court Chief Justice Ma. Lourdes Sereno niadtong Martes mipahimangno sa halawom nga implikasyon sa maong kaso ngadto sa mga “foundlings” kon mga bata nga kinit-an lang sama ni Senador Poe kon ang Labawng Hukmanan mopakanaog sa hukom nga di siya makadagan sa pagkapresidente kay di siya usa ka natural-born Filipino citizen.

“If you’re saying that foundlings are not natural-born citizens, have you thought about the impact on the rights of all foundlings?” nangutana si Sereno kang Commission on Elections (Comelec) Commissioner Arturo Lim. Sa unahan, ang Comelec mikanselar sa kandidatura ni Poe sa pagkpresidente sa piniliay karong Mayo tungod sa isyu mahitungod sa iyang pagka natural-born Filipino citizen.

Laing mahistrado sa Korte Suprema, si Associate Justice Marvic Leonen, pabor sab kang Poe. Apan ang iyang gusto mao nga itugyan ang maong pangutana ngadto sa mga botante susama sa baruganan sa mga alyado ni Poe nga nagkanayon nga ang tingog sa katawhan pinaagi sa ilang mga boto mao ang tingog sa Diyos. Unyag mapildi si Poe, impas sab ang kaugmaon sa tanang mga foundlings?

Ang atong Batakang Balaod nag-ingon nga kadto lang mga natural-born Filipino citizens ang mahimong Presidente, Bise Presidente, senador, kongresista, mahistrado o huwes. Nagkanayon si Sereno nga kon ang Korte Suprema mopakanaog sa ruling nga ang usa ka foundling di usa ka natural-born Filipino citizen, di sila makahupot sa liboan ka mga posisyon sa gobyerno nga nanginahanglan nga ang maghupot niini usa ka natural-born Filipino citizen.

Ang sukwahing baruganan sa Korte Suprema mahitungod sa kaso ni Senador Poe gipadayag ni Associate Justice Antonio Carpio nga niingon nga gilimitihan ang pipila ka mga dagkong posisyon sa gobyerno ug sa pinili nga mga propesyon alang sa mga natural-born Filipinos subay sa balaod nga gipanday sa Kongreso aron di kini buksan alang niadtong mga naturalized citizens lamang.

Matod pa ni Justice Carpio, di matawag nga gi-discriminate sa Kongreso ang mga naturalized citizens ug wa sab idili ang pagpasar og balaod sa umaabot nga panahon nga magbukas ning maong mga posisyon ug propesyon alang sa mga naturalized citizens.

Si Lim niingon nga ang Comelec igo lang nga nipatuman sa balaod ug sa Konstitusyon sa pagkanselar sa kandidatora ni Poe. Ang Article VII, Section 2, 1987 Constitution nagkanayon: “No person may be elected President unless he is a natural-born citizen of the Philippines, a registered voter, able to read and write, at least 40 years of age on the day of the election, and a resident of the Philippines for at least 10 years immediately preceding such election.”

Ang Konstitusyon nag-ingon nga ang natural-born citizens mao kadtong kansang mga amahan ug inahan nga citizens sa Pilipinas ug kadtong kansang inahan Pilipino, mopili sa Philippine citizenship inig abot sa age of majority.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph