Barrita: Pagpahunong sa Korte Suprema sa paglubong ni Marcos

GIMANDO sa Korte Suprema ang kasamtangan nga paghunong sa tanang mga preparasyon alang sa usa ka hero’s burial ni kanhi diktador Ferdinand Marcos.

Sa usa ka en banc session nga giluwatan niadtong Martes, ang Labawng Hukmanan nimando sa 20 ka adlaw nga status quo nga nag-reschedule usab sa oral argument sa unom ka mga kaso batok sa paglubong ni Marcos sa Libingan nga mga Bayani (LNMB) karong Agusto 31.

Gipasaka ang maong mga kaso aron pagpugong sa gikatakdang paglubong ni Marcos sa LMNB karong Septiyembre 18 tungod kay nakalapas kini sa Batakang Balaod ug sa uban pang mga balaod.

Usa sa mga katarungan mao nga di mahimong tawgon nga bayani si Marcos tungod sa daghang mga kalapasan sa tawhanong katungod nga nahitabo ubos sa Martial Law.

Ang Office of the Solicitor General (OSG), sa laing bahin, nanalipod sa mando ni Presidente Rody Duterte sa paglubong ni Marcos sa LNMB. Si Solicitor General Jose Calida niingon nga nahisubay kini sa balaod tungod kay si Marcos, sa buhi pa, usa ka presidente, usa ka commander-in-chief, usa ka retiradong beterano sa militar ug usa ka Medal of Valor awardee, busa mahimong ilubong siya sa LNMB.

Si Calida niingon nga ang paglubong ni Marcos sa LNMB di makapahimo kaniya nga usa ka bayani. “No amount of heartfelt eulogy, gun salutes, holy anointment, and elaborate procession and rituals can transmogrify the dark pages of history during Martial Law. The world has read and heard all of these,” matod pa ni Calida.

Sa ilang mga petisyon batok sa paglubong ni Marcos sa LNMB, si Ibarra M. Gutierrez III, abogado sa Coalition Against Marcos Burial, niingon nga ang paglubong ni Marcos sa Libingan ng mga Bayani nakalapas mismo sa “anti-dictatorship Constitution” sa Pilipinas.

“An indictment implicit in the Constitution states that Marcos is a criminal who must not be emulated. He is a criminal, a plunderer and a human rights violator,” matod pa ni Gutierrez.

“Our constitutional order, our policy for the past 30 years is being twisted. This is no mere technical matter on who should be buried; it hits the heart of the Constitution,” matod pa niya.

“How would his victims fare, how could they claim their rights have been violated, that it was Marcos’ fault they were raped, tortured, and lost their loved ones, if the one responsible for everything is now suddenly a hero?,” nagkanayon si Gutierrez.

Managlahing huna-huna sa paglubong ni Marcos sa Libingan ng mga Bayani nga kinahanglang pang hukman sa Korte Suprema.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)