Mongaya: Kilid ang naguba? | SunStar

Mongaya: Kilid ang naguba?

Time to read
1 minute
Read so far

Mongaya: Kilid ang naguba?

Monday, March 06, 2017

NATURAL lang nga mo­dapig sa biktima ang coverage sa media sa aksidente sa miaging Sabado sa kaadlawon diin nalambigit ang negusyante ug sportsman nga si David Lim.

Nagbangga ang sportscar nga gimaneho ni Lim ug ang motorsiklo nga gisakyan sa usa ka fish dealer nga ginganlan og Philip Pogoy mga alas 3 sa kaadlawon. Namatay si Pogoy.

Samot pa nga moingon ang police investigator nga head-on collision ang nahitabo.

Duna lang koy pangutana sa bersyon nga nag head-on. Nganong ang damage sa awto ni David Lim naa man sa wala nga fender, dapit sa wala nga ligid sa atubangan?

Samtang nalangkat ang fender, walay damage sa atubangan.

Makita man kini nato sa mga hulagway nga napatik sa mga mantalaan ug diha sa mga online news sites.

Kon head-on ang bangga, buot ipasabot nga naa gyud unta sa tunga sa atubangan sa awto ang damage. Apan naa kini sa kilid dapit sa wa­lang ligid.

Tungod niini, nagduda na hinuon ko sa bersyon sa police investigator. Nagduda na noon ko nga lahi ang tinuod nga hitabo.

Sigi, unsa kaha ang motibo sa investigator? Unsang misteryoha kaha nga usa ka head-on collision kuno apan ang naguba sa awto naa dapit sa walang ligid?

Natanom sa akong hunahuna nga dunay nagpahipi nga misteryo tungod sab sa akong kasinati-an karon lang bag-o.

Nagpatabang ang usa ka higala sa pamilya kay gipangayu-an siya og kwarta sa traffic investigator aron mauli ang iyang lisensya.

Nalambigit man gud siya og bangga tali sa iyang awto ug usa ka motorsiklo. Maayo na lang kay dakong buhi ang nagmotorsiklo.

Tuod man, nagkasabot sila ug nagpirmahay og amicable settlement. Apan wala giuli ang lisensya sa akong kaila kay kinahanglan kuno ang P3700.

Maayo na lang kay ni-intervene kita og nireklamo sa hepe. Wa na lang namo padak-a ang kaso kay di na man gusto mokiha pa ang akong kaila. Kontento man sila nga mauli na lang ang lisensya.

Apan lahi kining aksidente diin duha ang namatay ug mas maayo nga matugkad nako kon unsa ang ti­nuod, in fairness para sa tanan.

@anol_cebu sa Twitter

Gipatik sa mantalaang Superbalita Cebu Marso 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments