Editoryal: De Lima ipa-release? | SunStar

Editoryal: De Lima ipa-release?

Time to read
1 minute
Read so far

Editoryal: De Lima ipa-release?

Monday, March 20, 2017

Editoryal Cartoon by Ariel Itumay

SA niaging semana, nanawagan ang mga magbabalaod sa Europe ngadto sa gobiyerno sa Pilipinas sa dinaliang pagbuhi ni Senador Leila de Lima kinsa ilang giila ug gitahod tungod sa way kukahadlok nga nakigbatok ni Presidente Rodrigo Duterte.

Iyang gitumbok nga si Duterte maoy lider ug utok sa extra-judicial killings sa nasod ug mao usab ang nagmugna ug utok sa death squads sa Davao City niadtong mayor pa kini sa maong dakbayan.

Sa ilang resolution, ilang gikondinar ang nagkadaghan nga patay nga gipasiugdahan sa mga tinugyanan sa balaod ug mga grupo sa vigilantes tungod niining hugot nga anti-drug campaign sa administrasyon.

Gisukip usab sa maong resolusyon ang ilang gikabalaka ka­labot sa mga taho nga ang mga kapulisan nagmugna-mugna og mga ebidensiya aron lang mahatagan og igong rason ang ilang pagpamatay.

Sa iyang bahin, gipadayag ni De Lima ang iyang kahingawa ning pagpakabana sa European Parliament sa nahitabo kaniya ug sa samang higayon nanghina-ot nga ipadayon ang international investigation sa mga patay nga nahitabo ubos ning war on drugs sa administration ni Duterte.

Atong girespetohan kining pagpakabana sa European Parliament kalabot niining giingong extra-judicial killings sa nasod kay lagi di man sab nato malimod kining mga patay nga nahitabo sa palibot nga way igong hustisya nga motumaw.

Pero ambot og makatarunganon ba kaha ning ilang tinguha nga pabuhian si De Lima nga ang pagdakop niini dili man sa iyang pagpakigbatok sa EJK kon dili ang pagkalambigit man niini sa gidiling drugas.

Dili ba usa man kini ka pagpanghilabot sa laing nasod? Kuyaw og mao ni masunod kay sila na diay ang magbuot kon sa atong pamalaod.

Gipatik sa mantalaang Superbalita Cebu Marso 21, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments