Diola: Usap-usapa ug Tagamtama | SunStar

Diola: Usap-usapa ug Tagamtama

Time to read
1 minute
Read so far

Diola: Usap-usapa ug Tagamtama

Saturday, June 17, 2017

Binasi sa Deuteronomio 8:2-3,14-16; Salmo 147; 1 Taga-Corinto 10:16-17; ug Juan 6:51-58

UNSAY may mahitabo inigkaon nato? Matunaw ang giusap-usap ug kini magpabilin sa lawas sa hingtongdan gawas adtong mogawas sa laing parte sa lawas sa tawo. Kining pag-usap-usap ug pagtagamtam pamaagi lamang sa pagpahilis sa kinaon ug sa pagtilaw sa lami sa pagkaon.

Sayod kita nga adunay pipila ka mga pundok sa pagkaon. Kon ininglison pa nato, kini sila ang “fruits, grains, vegetables, protein, and dairy.” Matag usa niini nila adunay kaugalingong lami ug, labaw sa tanan, may kaugalingong ikahatag sa kaayohan sa atong lawas. Depende sa gikaon, sa gidaghanon, ug sa uban pang mga butang, ang usa ka masakiton maulian. Ang mobu, motaas. Ang maglisod og hinumdom, matabangan sa paghinumdom.

Apan sayod pod ta nga adunay poy gitawag og “staple food” ug kanatong mga taga-Asia, kan-on kini. O sige, alang kanatong mga Sugbuanon, mais kini. Sa ubang lugar, pan. Kon walay pan kun kan-on, di ta mabusog ug dili kompleto ang atong kaon.

Ang pisikal nga lawas sa tawo ang atong gihisgotan. May pagkaon pod alang sa kalag. Sa ebanghelyo ni Juan, duha ka matang sa pagkaon sa kalag ug espiritu ang gihisgotan. Ang una mao ang “pan nga nikanaog gikan sa langit.” Mao kini si Jesus sa iyang papel nga magtutudlo. Pinaagi niini, malamdagan ang mga panghunahuna ug kasingkasing sa mga gitudloan. Pagkaon ang iyang mga pulong.

Apan adunay poy “buhing pan” nga mabasa sa ebanghelyo karong adlawa. Si Jesus pod kini apan dili lamang iyang mga pulong. Ma-aninaw ni nato kay dili “mokaon” ang pulong nga gigamit kondili “mo-usap-usap”. Gidugangan pod ni Jesus ang pulong “tinuod” usa sa pagkaon. Ngano man ni?

Tataw nga adunay tinuoray nga pan nga siya mismo. Gani pagkahuman niyag diskurso, daghan sa iyang mga sumusunod ang mibiya kaniya kay “lisod kining pulonga”. Lisod sabton, di matugkad.

Diha sa libro sa Deuteronomio, gi-awhag ni Moises ang mga Israelita sa “paghinumdom” sa mga katingalahang butang nga gihimo sa Dios sa pagluwas kanila. Wa niya sila sultii nga “tugkara” kun “sabta” gyod ninyo, kondili “hinumdomi” niniyo o “ayaw hikalimti”.

Gipalalom ni Pablo ang pagtagamtam nato sa misteryo sa buhing pan. Miingon siya: “…Ug dili ba pakig-ambit man nato sa lawas ni Cristo inigkaon nato niining pan nga atong gipikaspikas?”

Dili diay ni ordinaryong pan ang hostia nga atong dawaton sa santos nga Misa. Lawas diay kini ni Cristo. Ang “tinuod nga kalan-on” nga gihisgotan ni Cristo ug nga dili madawat sa uban niyang mga sumusunod, iya mismong lawas. Di ni nato matugkad, dawaton ug pasalamatan na lang.

Mao kini ang kahulogan sa pangilin karong adlawa, ang gitawag nga “Lawas ni Cristo, kun sa linatin, “Corpus Cristi.”

Salamat O Ginoo!

Gipatik sa mantalaang Superbalita Cebu Hunyo 18, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments