Editoryal: Ayaw itelegrama | SunStar

Editoryal: Ayaw itelegrama

Time to read
1 minute
Read so far

Editoryal: Ayaw itelegrama

Saturday, June 17, 2017

Editorial Cartoon by John Gilbert Manantan

GIRONDA sa kapulisan ang balay ni Provincial Board Member Niño Rey Boniel sa Brgy. Guadalupe, dakbayan sa Sugbo.

Ilang gipangita ang armas sa opisyal, kansang lisensya ni-expire na niadtong 2015 pa. Wa nila gisalikway nga kini ang gigamit nga armas sa pagpatay ni Niño Rey sa iyang asawa nga si Mayor Gisela Bendong-Boniel. Kana kon siya gyud ang killer.

Ang pagsiksik sa armas gihimo human sila miawhag sa pamilya sa provincial board nga kini itahan. Kon tinuod nga si Niño Rey ang killer, makapaabot ba ang kapulisan nga kini itahan? Ebedensya gud ni.

Imposible usab nga hipuson sa opisyal ang armas nga magamit nga ebedensya batok kaniya. Iya usab ning gihuna-huna sa wa pa kini niya buhata. Kana kon tinuod ang tanan nga giasoy sa iyang mga kauban ug sa pagtuo ni Angela Leyson, higala sa mayor.

Gihimo usab ang ronda paglabay sa pipila ka mga adlaw human sa giingong krimen. Hayan nahipos na ang armas, kon wa kini gilabay sa usa ka dapit nga lisod makit-an. Natural lang nga kini di makit-an.

Unta, gihilom sa kapulisan ang tanan nilang mga lihok sa pagtigom og mga ebedensya nga di magtelegrama ngadto sa akusado.

Bisan tuod masabtan ang gihimo sa kapulisan nga gustong mopakita sa publiko nga sila nagtrabaho ug way gitapin-an bisan impluwensyadong tawo ang giakusahan, apan gikinahanglan ang hilom nga mga lakang aron di mahibaw-an.

Importante ang paglilong sa pagpanguha sa ebedensya hangtod nga mahan-ay na ang tanan.

Sa ingon niani nga kaso, importante ang pag-establisar sa motibo sa krimen, ang armas nga gigamit ug ang lawas sa biktima. Apan sa pagkakaron, maorag wa pay nakuha ang kapulisan bisan usa nianing tulo.

Hinaut pa nga sa mosunod nga mga adlaw, ila na kining mahingpit.

Gipatik sa mantalaang Superbalita Cebu Hunyo 18, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments