Mongaya: Nganong i-ban ang unli rice? | SunStar

Mongaya: Nganong i-ban ang unli rice?

Time to read
1 minute
Read so far

Mongaya: Nganong i-ban ang unli rice?

Saturday, June 17, 2017

BITAW. Nganong did-an man nato ang atong mga kaigsunonan nga gustong mabusdik ilang tiyan sa kabusog tungod sa unli rice? Bisan og dili kini makaayo sa panglawas, apan ubay-ubay gyud ang masuko niining ipa-ban ang unli rice.

Naa man sab gyuy naanad nga daghanon ang kan-on aron mabusog bisan og gamay lang ang sud-an. Mahal baya ang sud-an. Mosuwa na man gani og asin kon way lain.

Nakahinumdom gyud ko kaniadtong gamay pa ko. Ipadaghan ang kan-on samtang ang sud-an usa lang ka itlog o chorizo.

Di ko mahibong nga daghan kita nga ingon niini.

Gani karon nga maglikay na ko og kan-on kun rice (naay panagsa kon way lain og gutom na gyud), malingaw ko sa reaksyon kon mopalit ko og pagkaon sa mga karenderia.

Ikapila ko makasinati nga ikadaghan pangutan-on kon di ba ko mag-rice dayon tutokan pa unsaon nako paglanlan sa pulos sud-an.

Daghan ang wala makahibawo nga ang sobrang kan-on di maayo sa panglawas.

Gani, nagkanayon si Dr. Letlet Mission sa National Nutrition Council (NNC) 7 nga ang subrang rice lakip sa mga hinungdan sa diabetes, mga cardiovascular diseases, ug mga sakit nga may kalabutan sa diet kun sa kinaon.

Dayon, kon subra ra ang kan-on, mas malimitado ang pagkaon og uban pang klase sa makaon nga gikinahanglan sa lawas.

Matod pa ni Mission, ang mga lalaki nga nagpangidaron og 19 ngadto sa 59 anyos anga­yan lang mokaon og one and one-half cup sa rice kada meal. Ang babaye sa samang edad nag­kinahanglan lang og one cup.

Mas maayo pa gani sa panglawas kon imbes humay, mokaon hinuon og mais o kining mga root crops nga sama sa kamote kay tinubdan kini sa fiber ug makatabang pa kita sa atong mga mag-uuma.

Nakahibawo na man kita nga ang bulto sa supply sa humay sa atong nasud gikan man sa gawas. Mga imported man kini.

Bisan pa man, sakto nga di sab gyud nato did-an ang atong mga kaigsuonan nga di mahimutang nga wala ang unli rice.

Mayorya na

Kon wa ko masayop, mayo­riya na ang mga tigsuporta ni Mayor Tomas Osmeña diha sa Konseho sa Syudad sa Sugbo ug di na epekto ang mga “babag moves” sa oposisyon.

Hinuon, naa pa man silay baraha sama sa ilang koneksyon ngadto sa Malakanyang ug nanghinaot sila nga molusot ang mga reklamo nga gisang-at ug mamunga kini sa suspensyon.

Ang nakaapan lang alang sa oposisyon kay duna say daghang koneksyon si Mayor Osmeña ug dili kini kabentahaan. Hanap kaayo kining ilang gilauman nga suspensyon.

Gipatik sa mantalaang Superbalita Cebu Hunyo 18, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments