Nalzaro: Happy father's day | SunStar

Nalzaro: Happy father's day

Time to read
1 minute
Read so far

Nalzaro: Happy father's day

Saturday, June 17, 2017

MATAG ikatulong Dominggo sa Hunyo, gitimaan o gi-obserbar ang Father's Day. Adlaw kini sa mga amahan kinsa gi-ila nga haligi sa pamilya. Siya ang tinubdan sa kusog ug inspirasyon sa matag banay. Siya ang provider o naghatag og suporta sa pamilya. Siya maoy ga­ba­yan sa matag sakop sa banay.

Ang amahan maoy unang nagtudlo sa mga anak sa maayong pamatasan ug respito. Ang amahan maoy iwag aron lamdagan ang dalan nga subayon sa matag sakop sa pamilya. Siya maoy unang nagtudlo sa iyang mga anak aron mamahimo ki­ning maayong tawo sa umaabot nga mga adlaw. Siya usab ang modisiplina kon sa iyang tan-aw misubay sa liko nga dalan.

Hinuon, di usab tanang ama­han nga midala ning maong papel gumikan kay daghan man diha ang nagpabadlong, wa magpakabana sa pamilya.

Apan diin magsugod kining Father's Day ug nganong nauso man kini? Matod pa sa pipila ka mga accounts, ang unang Father's Day unang gisaulog sa Washington State niadtong Hunyo 19, 1910. Usa ka babaye nga gihinganlan og Sonora Smart Dodd ang nakahuna-huna ning maong idea aron paghatag og pasidungog ug pag-selebrar sa iyang amahan human siya makadungog sa sermon atol sa pagsaulog sa Mother's Day sulod sa simbahan niadtong 1909.

Atol sa sermon, nadunggan ni Sonora nga ang tanang pagdayig atoa gibubu sa inahan. Mao nga nakahuna-huna siya sa paghatag usab og pasidungog sa mga amahan labi pa sa iyang papa nga usa ka war veteran, William Smart. Ang iyang amahan maoy bugtong nagbuhi ni Sonora gumikan kay namatay man ang iyang asawa sa dihang gipanganak si Sonora. Adunay laing lima ka mga igsoon si Sonora nga gibuhi tanan sa iyang amahan.

Naningkamot si Sonora nga mamahimong opisyal ang pa­deklarar sa Father's Day. Iyang gipangdoul ang mga pulitiko sa Spokane, Washington aron i-lobby ang iyang plano ug opisyal nga madeklarar ang paghatag og pasidungog sa mga amahan. Una niyang gisugyot nga Hunyo 5 ang Father's Day. Apan ang na-uyunan mao ang ikatulong Dominggo sa Hunyo. Ang ubang nasud sama nato sa Pilipinas misunod lang usab ning maong kasaulugan.

Gipatik sa mantalaang Superbalita Cebu Hunyo 18, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments