Barrita: Mga binilanggo nga nagdasok | SunStar

Barrita: Mga binilanggo nga nagdasok

Time to read
1 minute
Read so far

Barrita: Mga binilanggo nga nagdasok

Sunday, June 18, 2017

NAGHUOT na ang mga binilanggo sa mga bilanggoan sa tibuok nasud. Mao kini ang gibutyag sa Commission on Audit (COA), ang ahensiya nga nagsubay kon giunsa paggasto sa pundo sa gobiyerno.
Sumala pa sa COA, ang congestion rate sa mga bilanggoan sa tibuok nasud niabot na sa 511.9 porsiyento niadtong 2016. Makaingon kita nga ang mga piniriso nagsinardinas na.

Pero kon moplait kag sardinas, mas maayo pa tingali ang sardinas kay lugak pa kay naglabi man ang tomato sauce.

○ ○ ○

Ang 2016 annual audit report sa COA alang sa Bureau of Jail Management and Penology (BJMP) nga gipagawas niadtong Hunyo 15 niingon nga ang mga bilanggoan sa tibuok nasod adunay holding capacity alang sa 20,746 lang ka mga piniriso.

Apan sa tuig 2016, kining ma­ong mga bilanggoan adunay 126,946 ka mga inmates, nisulbong og 30,544 gikan sa tuig 2015.

Gikan sa tuig 2015 hangtod sa 2016, ang jail congestion rate natala sa 364.7 porsento. Mao nga sa ubang mga prisohan, turno-tuno na ang pagkatug sa mga piniriso kay di na makahigda ang tanan sa sawog.

○ ○ ○

Si Senate Minority Leader Ralph Recto niawhag nga hatagan og pardon kadtong mga piniriso nga makasiton, tiguwang na o kaha himalatyon, ilabi na kadtong wa makonbikto sa heinous crimes.

Matod pa ni Recto, mao kini ang dinalian nga solusyon sa paghuot sa atong mga prisohan. Busa kadtong mga piniriso nga iyang gihisgotan mahimong buhian basi sa humanitarian grounds.

Dugay man gud ang pagtukod og mga bilanggoan. Mas dali ang pagpamuhi sa mga piniriso.

○ ○ ○

Sumala pa sa COA, ang pag­huot sa mga prisohan mabasol sa nagkadaghan nga mga kaso nga may kalambigitan sa illegal nga drugas. Daghan sab ang mga kaso nga nag-ung-ong sa mga hukmanan tungod sa kakuwang sa mga huwes.

Apan sa akong yano nga pagsabot, tungod kini nga nilihok ang kapulisan batok sa illegal nga drugas. Ang Philippine National Police nitaho nga sukad sa Hunyo 30 sa imaging tuig, nakasikop silag kapin sa 4,300 ka mga tawo nga nahilambigit sa illegal nga drugas.

Gipatik sa mantalaang Superbalita Cebu Hunyo 19, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments