Espinoza: Nganong way kaso? | SunStar

Espinoza: Nganong way kaso?

Time to read
1 minute
Read so far

Espinoza: Nganong way kaso?

Monday, June 19, 2017

KIHA. Angayan nga ikiha na dayon ni Konsehal Joel Garganera si kanhi konsehal Nida Cabrera, nga karon consultant sa environment sa dakbayan sa Sugbo, aron atong masuta kon namakak ba siya.

Si Konsehal Garganera ma­kamao ug naay friends sa me­dia. Imbis nga iyang ikiha diretso si Cabrera sa Ombudsman o sa piskaliya, iyang giagi sa media aron dunay paukyab gamay sa isyu.

Matod ni Konsehal Garganera nga namakak si Cabrera sa iyang pamahayag nga ang landfill application adto iduso sa opisina sa Department of Environment and Natural Resources (DENR) sa Manila.

Gihagit ni Garganera si Cabrera nga iyang ipakita ang giingon nga memorandum nga naglagda nga ang landfill applications adto isumitir sa DENR Manila ug ang iyang certifico nga nakaatender siya og workshop sa Manila.

Gidaklitan usab ni Garga­nera ang ARN Builders, nga dunay landfill project sa Bina­liw nga iyang giinitan sa miagi, nga nakigkonsabo si Cabrera aron mahatagan ang ARN Builders og ECC kon environmental compliance certificate gikan sa DENR.

Sukad kaniadto, di malalis nga si Konsehal Garganera way amor ni Cebu City Ma­yor Tomas Osmeña labina og maghisgot ta og pulitika. Bi­sag unsa nga butang basta naay tipik nga pagduda nga si Mayor Tomas dunay kalabutan di mahimutang si Panday.

Dunay mihunghong na ko nga nagduda si Panday nga kang Tomas ang landfill project diha sa Binaliw nga iya sa ARN Builders maoy abtik kaayo siya nga nakababag sa maong proyekto.

Balik ta sa kiha nga ipasaka ni Panday batok ni Cabrera. Bisag atong ingnon namakak si Cabrera sa iyang giingon nga adto sa Manila DENR ang landfill application isumitir, di man na siya usa ka salaod.

Makiha og pamakak o perjury si Cabrera kon duna siyay gipirmahan nga dokumento nga gisumpaan unya ang iyang gisulti sukwahi sa naa sa dokumento. Kon way dokumento, way kaso. Mao diay nga giagi na lang ni Panday sa media ang iyang isyu batok ni Cabrera.

Gipatik sa mantalaang Superbalita Cebu Hunyo 20, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments