Mongaya: Naa ra man diay si Digong | SunStar

Mongaya: Naa ra man diay si Digong

Time to read
1 minute
Read so far

Mongaya: Naa ra man diay si Digong

Monday, June 19, 2017

HUMAN sa mga lima ka adlaw nga wa siya magpakita sa publiko sugod ad­tong seremonya sa Independence Day, nitumaw ra si Presidente Rodrigo Duterte sa miaging Sabado pinaagi sa pagbisita ug pagdiskurso sa Agusan del Norte.

Nagpista na unta ang iyang mga kritiko sa social media kay abig na-stroke na. Lalim bay kinahanglang mopahuway human sa grabi niyang mga buluhaton sulod sa 13 ka adlaw. Niabot na man sa 72 ang edad ni Digong ug nagkinahanglan na baya siya og pahuway.

Sa iyang pakigpulong, nag­­­kanayon si Digong nga di angayang mabalaka ang katawhan kay naa may bise presidente kon duna may dautang mahitabo niya.

Ang ako lang masulti kay mabalaka ang iyang mga tigsuporta labi na ang mga pro-Marcos kon si Bise Presidente Leny Robredo ang molingkod.

Kini ra bang pabuhi sa dugo ni Bongbong Marcos nga electoral protest subidahon gyud kaayo. Moguwa pa karon nga si Marcos mao ang wala maka-move on.

Kay nganong atat man gyud kaayo kini si Marcos nga makatungtong na sa Malakanyang. Di makahulat ang pildero sa 2022?

Dayon ngil-ad sab alang sa mga anti-Digong nga molaum sa kamatayon sa presidente simbako palayo lang.

Tingali, tinuod gyud nga igo lang nipahuway ang presidente. O basin gusto sab siyang mosuroy nga siya lang aron makita ang tinuod nga kahimtang sa nasud. Lahi man gud kining daghan kaayong mga tawo nga nag-alirong kaniya.

Mas maayo man gyud kon makita ni Digong ang tinuod nga kahimtang layo sa mga sulsultant.

Mga buta

Maayo nga gi-cancel na sa Department of Tourism (DOT) ang kontrata niini sa McCann Worldgroup Philippines nga nikantidad og P650 milyones human sa makauuwaw nga tourism ad nga bag-ong lang gipakita sa publiko.

Sa panahon sa social media, dali kaayong nasakpan nga ang television commercial nga gihimo sa McCann kinopya diay sa usa ka commercial sa South Africa kaniadtong 2014.

Nasayran dayon nga dili diay orihinal nga konsepto kining paggamit sa usa ka turista kintahay nga buta.

Sa South African ad, usa ka buta nga Caucasian kun puti ang sentro sa commercial. Nagsuroysuroy siya sa lain-laing tourism spots sa maong nasud hangtod nga sa katapusan, iyang gikuha ang iyang walking step.

Sa commercial nga gihimo sa McCann, usa ka buta nga Hapon ang bida. Nagsuroysuroy gihapon siya sa lainlaing mga tourism destination sa Pilipinas hangtod nga sa katapusan, iyang gikuha ang iyang walking stick.

Sa una, daw nidepensa ang DOT apan kalit lang dayon nga ilang gianunsyo nga gi-cancel na ang kontrata sa maong advertising agency.

Ang ako lang karon, unsa kahay nagpaluyo nga drama sa maong kontrata? Eng-eng-eng.

(@anol_cebu sa Twitter)

Gipatik sa mantalaang Superbalita Cebu Hunyo 20, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments