Kondisyon ni Osmeña | SunStar

Kondisyon ni Osmeña

Time to read
1 minute
Read so far

Kondisyon ni Osmeña

Sunday, July 16, 2017

Editoryal Cartoon by Ariel Itumay

SA niaging semana, way nipalag sa mga dagkong officials dinhi sa Sugbo sa pamahayag ni Presidente Rodrigo Duterte nga ang Cebu maoy usa na karon ka hot spot sa mga ilegal nga drugas.

Buot ipasabot nga bisan pa man sa hugot nga kampanya nga gilusad sa presidente, padayon gihapon ang paghitak sa shabu dinhi sa Sugbo.

Gibutyag usab sa presidente nga anhi na dinhi moagi ang mga kontrabando o shipment sa mga illegal drugs aron ipang-dispatsar ngadto sa lain-laing mga dapit sa nasod.

Si Chief Supt. Noli Taliño, ang hepe sa Police Regional Office (PRO) 7 ug si Director Yogi Filemon Ruiz sa Philippine Drug Enforcement Agency (PDEA) 7, mituo sa pamahayag sa presidente.

Si Cebu Governor Hilario Davide III miingon nga usa ka dakong hagit ang gibutyag ni Duterte ug nanghinaot nga nagsilbi unta kining dakong hagit sa mga opisyal.

Pero mora man og lahi ang tirada ni Cebu City Ma­yor Tomas Osmeña sa gipadayag sa presidente. Iya man hinuon kining gipahimuslan ug gihimong kondisyon aron makuha ang iyang kagustohan.

Matod sa mayor nga kon ibalik dinhi sa Sugbo ang iyang mga paboritong police officials nga sila si Senior Supt. Benjamin Santos ug Chief Supt. Patrocinio Comendador Jr. iyang angkunon ang responsabilidad kalabot sa drugas.

Ang duha, kon kahinumdoman, gibalhin ngadto sa layong dapit ni PNP chief General Ronald dela Rosa isip kabahin sa lahugay sa kapulisan, sa miaging tuig, ilabi na sa gipangdudahan nga nalam­bigit sa illegal drugs. Matod sa mayor nga mobalik siya sa iyang pagka-aktibo sa kampanya batok sa illegal drugs kon kining duha ibalik dinhi sa Sugbo.

Ambot og nganong nagkinahanglan pa man si Osmeña sa duha aron lang moaktibo siyag balik sa kampanya batok sa drugas.

Unsa may anaa sa duha nga di niya mahimo sa ubang opisyal?

Gipatik sa mantalaang Superbalita Cebu Hulyo 17, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments