Nadela: Ang CCTV Camera sa Mandaue | SunStar

Nadela: Ang CCTV Camera sa Mandaue

Time to read
1 minute
Read so far

Nadela: Ang CCTV Camera sa Mandaue

Sunday, July 16, 2017

TAUDTAOD na nga napahimuslan sa publiko  ang mga CCTV camera nga gipangtaud sa halos tanang eskina sa kadalanan sa dakbayan sa Mandaue. Mga aksidente sa kadalanan, kalapasan sa balaod sa trapiko ug ubang panghitabo  ang nasaksihan pinaagi sa kuha sa mga camera nga na-record sa command center nga nahimutang sa city hall.

Usa sa pinakabag-o nga  nakuhaan og video mao kadtong disgrasya sa eskina United Nations Avenue ug DM Cortes St. tali sa motorsiklo ug taxi.  Ang taxi padung niliko  pa wala samtang ang motorsiklo nga may backrider nga babaye padung sa Marcelo Fernan Bridge. Basi sa video human magbangga nilupad ang dri­ver ug backrider tungod sa impact. Patay ang backrider ug na-ospital ang driver.

Apan wa pa mahuman dinhi ang eksena. Kay samtang gipaabot ang rescue team ug ambulansiya, may tawo nga niduol ug nipunit sa natagak nga pitaka sa driver ug gisipi­tan. Ang buhatan ni C/Insp. Fructouso Lim, pangulo sa Traffic Group, nihimo ug follow up pag-ila sa maong tawo ug pagbawi sa pitaka. Nailhan nila ang maong tawo nga si Patricio Soco usa ka dispatcher apan wala na sa iyang pinuy-anan. Ang taga Theft and Robbery Section pinaagi nila ni P03 Junrey Gregade ug P01 Jerry Gascoña niadto sa lungsod sa Consolacion human masayri nga nagtago didto ang suspek.

Sa usa ka payag ang pitaka nga may sud nga Identification Card sa biktima ang ilang napalgan. Wala na ang P5,000 ingon man ang suspek. Matod ni Lim ilang pasakaan og kasong pagpangawat aron malutsan kini og warrant. Ang video sa suspek nga nisipit sa pitaka nanganaw-kanaw na sa internet.

Kon wa pa ang CCTV came­ra way nasayod sa gibuhat sa suspek. Inay motabang og bantay sa mga biktima samtang nagpaabot sa ambulansiya nitabang na hinuon og duot. Busa kita nga naa kanunay sa karsada magmabinantayon ka­nunay.

Bisan diha sa sud sa jeep dunay daghang panghitabo nga di tuyuon nga atong masaksihan. Sama sa mga pasahero nga padung mabiktima sa pagpanguot. Ang uban mahadlok mobadlong. Samtang ang uban mosekreto og kuha og video pinaagi sa ilang cellphone.

Ang nindot unta nga masanta ang suspek unya may video pa. Busa sa mga Local Government Units nga nagplano nga magbutang ug CCTV Camera ayaw kalimti ang mga karsada ug eskinita.

Gipatik sa mantalaang Superbalita Cebu Hulyo 17, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments