Editoryal: Nahadlok | SunStar

Editoryal: Nahadlok

Time to read
1 minute
Read so far

Editoryal: Nahadlok

Saturday, August 12, 2017

Editorial Cartoon by John Gilbert Manantan

NIMANDO ang korte sa Sugbo sa mga bangko ug Registry of Deeds nga di pahilabtan ang mga kabtangan ug kuwarta sa gidudahang drug lord nga si Franz Sabalones.

Segun sa pakisusi sa Anti-Money Launderining Council (AMLC), mokabat sa P350 million ang balor sa mga kabtangan ug deposito ni Sabalones.

Kon di makahatag og klarong katin-awan si Sabalones nga legal ang iyang pag-angkon ning gidak-on sa kabtangan ug cash, sakmiton kini pabor sa kagamhanan.

Giimbestigar si Sabalones human kini nitahan kay ginganlan ni Presidente Rodrigo Duterte nga usa sa mga drug personalities dinhi sa Sugbo.

Gawas ni Sabalones, duna pay mga drug personality nga gitino ang pagpuyo kon makasapal ba kini sa dagko nilang kabtangan ug luho nga pagpuyo.

Samtang nagsusi ang kagamhanan sa kinabuhi sa gidudahang mga durugista, tak-om kini sa ila mismong mga opisyal ug sakop nga kadudahan ang lifestyle.

Komon na nga nahibaw-an ang mga buhatan sa Bureau of Internal Revenue (BIR) ug Bureau of Customs (BoC) nga naghitak ang kurap­syon.

Apan way bisan usa nga opisyal sa kagamhanan ang nangusog sa paglusad og lifestyle check sa mga opisyal ug kawani niini.

Hayan tungod sa kahadlok nga mosumbalik kanila kining mga tawhana tungod kay duna usab silay kaugalingong mga interest nga gipanalipdan.

Kadaghanan sa mga opisyal, labina sa mga pinili, nga dunay pribadong mga negusyo, wa pay apil ang ilang mga tigsuporta.

Kon ilang uyogon kining mao nga mga buhatan, hayan mobawos kini kanila. Mahisama sila og nag-uyog og balay sa putyokan busa, sila nagpakahilom na lang.

Gipatik sa mantalaang Superbalita Cebu Agosto 13, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments