Mongaya: Suportahan ang BRT | SunStar

Mongaya: Suportahan ang BRT

Time to read
1 minute
Read so far

Mongaya: Suportahan ang BRT

Saturday, August 12, 2017

KLARO na man unta nga makaayo sa Syudad sa Sugbo ang Bus Rapid Transit (BRT). Apan si Presidential Assistant for the Visayas Mike Dino padayong nagbatok niini.

Bisan pa man sa kadaghan sa mga pagtuon nga makaalibyo ang BRT sa kahuot sa trapiko dinhi sa Siyudad sa Sugbo, moinsister si Dino nga makadaot kini.

Sa iyang press confe­rence, giesplikar ni Dino nga mosamot kahuot ang dagan sa publiko kay makuhaan na man og duha ka mga lane ang kadalanan. Busa, matod niya, magpunsisok na hinuon ang ubang mga sakyanan sa duha na lang sab ka lane.

Ang nakasayop niining maong rason kay palapdan man lagi ang dalan nga maagian sa BRT. Gawas pa, di na paagi-on ang mga PUJ sa agianan sa BRT.

Kay nakasabot na man ang Neda busa nitugot na kini nga dugangan ang budget sa BRT gikan sa P10 bilyones ngadto sa mga P17 bilyones.

Gani, si Neda chairman Ernesto Pernia pa ang niduso sa approval sa maong pag-umento sa budget sa BRT.

Ang sunod nga mahitabo mao ang approval sa Neda board diin si Presidente Rodrigo Duterte na mismo ang mo-preside.

Kay tagilid man si Dino kon mga teknikal nga isyu ang hisgutan, dako ang posibilidad nga magmugna ang iyang kampo og mga bag-ong isyu.

Duna gani silay gisulayan sa pagpalupad nga isyu. Ngano kuno nga dili transparent ang paggasto sa na-release na nga P1 bilyones gikan sa World Bank?

Apan sa pagka tinuod, sayup ang ilang interpretasyon. Ug ang P460 milyones nga na-download na gikan sa Department of Transportation (DOTr) wa pa magamit ug naa pa sa usa ka trust fund.

Tungod niini, niabot na tingale kita sa punto nga angay ipakita na sa grupo nila ni Dino nga subra pas mayoriya sa mga Sugboanon ang pabor sa BRT ug nasuko karon nganong gibuhat niining usa ka presidential assistant ang pagbabag sa kalamboan sa Syudad sa Sugbo.

Kinahanglang makita ni Presidente Duterte nga kapin pa sa mayorya sa mga Sugboanon ang nituo nga kining BRT makatabang sa pagsulbad sa kahuot sa trapiko.

Kinahanglan makita pa gyud ni Presidente Duterte nga makadaot kining gibuhat sa iyang representante dinhi sa Visayas.

Imbes motabang si Dino nga madali ug mapahapsay ang pagpatuman sa mga proyekto sa presidente dinhi sa atua, iya man hinuong gibuhat ang tanan aron mababagan kining BRT.

Ang nakapaet pa gyud kay, matod pa sa Commission on Audit (COA), kada tuig nga malangay kining BRT, modako ang bayranan sa kagamhanan. Kon duphan ni Presidente Duterte kining iyang assistant, maduhig pa hinuon siya niini.

Gipatik sa mantalaang Superbalita Cebu Agosto 13, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments