Nalzaro: Unsay gikahadlukan sa PNP? | SunStar

Nalzaro: Unsay gikahadlukan sa PNP?

Time to read
1 minute
Read so far

Nalzaro: Unsay gikahadlukan sa PNP?

Wednesday, September 13, 2017

KINING taga Philippine National Police (PNP) sama sa ubang nga ahensiya sa kagamhanan maayo lang mo-request og media coverage kon adunay dagkong positibong balita sa ilang mga ahensiya. Ang ilang mga secretary kusog kaayong manawag ug mo-fax o e-mail sa mga news organizations aron mangimbitar og presscon kay dunay i-anunsiyo ang ilang mga police commanders o mga regional directors.

Apan kon dunay mga nega­ti­bong makita sa ilang buhatan sama sa mga abuso, anomaliya ug kurapsiyon, dili na maningog ang ilang mga labaw kon pangayoan og reaksiyon sa media. Magtulod-tulod na.

Bisan ang ilang mga designated spokesmen dili na maningog. Motago na gikan sa media ug daghan na og rason nganong dili mo-atubang sa media.

Karong bag-o, adunay kamanduan gikan sa Kampo Krame nga dili na basta-basta ihatag o ipabasa ngadto sa mga sakop sa media ang mga spot reports ug journal kabahin sa post-operations. Mao man god kini ang tamdan sa mga balita labi pa kon walay opisyal nga personal nga mahinabi sa mga tigbalita.

Nganong ila man kining ihikaw ngadto sa media? Ila lang untang did-an ang media nga makabasa sa mga inpormasyon sa kapulisan kon naglambigit kini og national security. O ba kaha kanang gi-plano pa ang operasyon. Apan kon nahuman na ang operasyon ug wala nay follow-up operations, puwede na man kanang ihatag ngadto sa media.

Dili usab kita makabasol sa atong lokal nga kapulisan kay igo ra man usab silang nagsunod sa mando sa ilang labaw. Apan makapangutana nga unsa may angay itago sa kapulisan? Nabalaka sila nga mabuking ang ilang gipanghimo. Mismo si Presidente Rodrigo Duterte mihagit man gani ngadto sa mga sakop sa media nga mokuyog sa matag operasyon sa kapulisan aron mahunong na kining mga pagduda kabahin aning na­hitabong extra judicial killings unya karon did-an na hinuon ang media nga mobasa sa sport report ug journal.

(bobbygnalzaro@gmail.com)

Gipatik sa mantalaang Superbalita Cebu Septembre 14, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments