Editoryal: Insulto | SunStar

Editoryal: Insulto

Time to read
1 minute
Read so far

Editoryal: Insulto

Thursday, September 14, 2017

Editorial Cartoon by John Gilbert Manantan

ANG Ubos Balay Balauranan mipasar og P1,000 nga budget alang sa Commission on Human Rights (CHR). Bisan tuod kon ang mao nga pagpasar mahug lang nga simbolismo tungod kay seguradong taas nga gahin kay sa P1,000 ang mapasar kon mahiadto na kini sa Bicameral Committee, ang ilang gibuhat sa usa ka buhatan nga gimugna base sa Constitution, di maayo.

Nasuko sila sa pag-imbestigar sa CHR sa mga kaso sa illegal drugs nga nahitabo sa mga operasyon sa kapulisan.

Natural nga mosusi ang CHR tungod kay mao kini ang ilang mandato sumala sa nalatid sa Constitution. Di sila makahimog aksyon sa binuhatan sa mga criminal.

Sumala sa gilatid sa Constitution, ang maimbestigar lang sa CHR mao ang civil ug political nga mga sala nga nahimo sa mga tawo nga naa sa kagamhanan. Mga kalapasan sa tawhanong katungod nga nahimo sa usa ka institusyon sa gobyerno ug opisyal niini.

Kon usa ka pribadong tawo ang nakahimo, ang CHR di makahimo og lakang. Iya sa kapulisan ang tahas ingon man sa korte ang paghupot ug pagpadagan sa kaso.

Busa, di makahimo og imbestigasyon ang CHR sa mga krimen nga nahimo sa mga criminal kay di kini ubos sa ilang jurisdiksyon.

Ila usab nga tahas ang pag-imbestigar kon dunay mga reklamo batok sa mga opisyal ug personnel sa kagamhanan. Kon nag-imbestigar sila ning mga kaso sa mga pulis sa illegal drug operations, angay pa silang daygon kay ilang gitrabaho ang mga tahas nga gisangon kanila.

Ang gibuhat karon sa Ubos Balay Balauranan maisip nga panamastamas sa Constitution.

Kon pagpadayag man kini nila sa ilang kasagmuyo sa mao nga buhatan, mahimo nga ila kining suwatan, di kay insultohon atubangan sa publiko.

Gipatik sa mantalaang Superbalita Cebu Septembre 15, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments