Nalzaro: Mandatu sa CHR | SunStar

Nalzaro: Mandatu sa CHR

Time to read
1 minute
Read so far

Nalzaro: Mandatu sa CHR

Thursday, September 14, 2017

DILI nato angay basulon o kontrahon ang Commission on Human Rights (CHR) kon mohimo man sila og imbestigasyon sa mga pagpamatay nga gihimo sa atong mga awtoridad niadtong mga tawo nga nahilambigit sa illegal nga drugas.

Dili nato isipon nga mga kontrabida kining taga CHR labi pa niadtong kusganong misuporta sa war on drugs sa Duterte administration, labi pa kadtong nabiktima sa extra judicial killings gumikan kay mao kana ang ilang trabaho.

Ang CHR namugna pinasikad sa atong 1987 Constitution. Anaa sa Section 18, Article 13 sa Batakang Balaod ang pagtukod sa CHR aron maoy mo-imbestigar sa abuso sa mga ahente ug mga opisyal sa kagamhanan. Maka-imbestigar lang ang CHR kon ang nakahimo sa salaod usa ka ahente sa gobiyerno sama sa mga pulis, sundalo ug ubang mga law enforcers sama sa Philippine Drug Enforcement Agency (PDEA) ug National Bureau of Investigation (NBI).

Maka-imbestigar ba ang CHR kon usa ka sibilyan nakapatay o nakaangol og usa ka awtoridad? Dili. Kay wala kana sa ilang mandatu. Tinuod nang giingon nga kon sibilyan ang mapatay sa pulis, naay human rights. Apan kon pulis ang mapatay sa sibilyan, alrights lang.

Mao lagi kay dili man maka-imbestigar ang CHR sa mga sibilyan nga makahimo ug salaod batok sa mga awtoridad.

Kabahin aning budget nga gihatag sa Ubos Balay Balauranan nga P1,000, aw, dako gyud ning binoang. Morag ila lang gi-abolish o giwagtang kining maong ahensiya. Dili nila basta-basta wagtangon ang CHR kay sama sa akong gikaingon sa unahan, mugna kini sa Konstitusyon. Ila unang amendahon ang Batakang Balaod usa nila puwedeng wagtangon ang CHR.

Dili pa kita tanto mabalaka niini kay anaa pa man ang Senado. Kon maghisgot ta og budget ari man na gyud magsugod sa House. Apan naa pa ang Senado nga mopagawas usab sa ilang version. Basin mahatagan sila sa Senado. Unya plantsahon pa gyud kana sa bicameral conference committee. Tan-aw nako, mahatagan na og gahin ang CHR.

(bobbygnalzaro@gmail.com)

Gipatik sa mantalaang Superbalita Cebu Septembre 15, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments