Albor: Dili tanang lagda matuman | SunStar

Albor: Dili tanang lagda matuman

Time to read
1 minute
Read so far

Albor: Dili tanang lagda matuman

Friday, October 06, 2017

MAG-AGAD sa politi­kanhong sitwas­yon. Palakasay ma­oy motuis hinungdan nga dili tanang lagda o balaod matuman. Basi sa Sec. 45 sa Local Govt. Code kabahin sa mabakanti nga posisyon ang partido nga gipasilongan sa piniliay maoy moduso og hulip.

Apan sukwahi ang nahitabo sa siyudad sa Lapu-lapu kay ang gihulip sa namatayng konsehal nga si Damian Gomez sa LP mao si Atty. Jeannify Tan-Dungog sa PDP-Laban. Si Sec. Adelino Sitoy maoy miindorso ni Dungog nga maoy gisanong ni Pres. Rodrigo Duterte ug gisalikway ang giindorso ni Mayor Paz Radaza sa LP.

Samtang sa siyudad sa Sug­bo nag-ilog ang Team Rama-UNA ug BOPK-LP hulip ni Konsehal Hanz Abella nga gitudlong commissioner sa NLRC. Si Abella nagpasilong sa Team Rama-UNA sa miaging eleksyon apan kalit nga mitapon sa BOPK-LP.

Ang Team Rama-UNA miduso ni Junjun Osmeña nga anak ni kanhi Vice Mayor Renato Osmeña ug ang BOPK-LP miduso sa kanhi SK Federation president nga si Rengelle Pelayo. Gumikan usab sa nagkainit nga kawa sa politika ug aron usab magpabilin nga mayoriya sa BOPK si Mayor Tomas Osmeña mohimog legal nga aksyon aron mapalagpot ni ABC Pres. Philip Zapra nga barangay kapitan sa Tisa.

Angay nang mobiya si Zapra isip ex-officio member sa konseho kay natapos na ang iyang termino sa Hunyo 2016.

Maoy gimanok sa BOPK si Barangay Capt. Franklin Ong sa Kasambagan. Maoy gibasihan ni Osmeña ang Republic Act 10923 nga naglugway sa barangay ug Sk elections sa Mayo 14, 2018 nga magpadayon ang serbisyo sa mga incumbent officials apan walay lugway sa ex-officio member sa ABC sa konseho.

Apan milantugi ang Team Rama nga magpabilin si Zapra kay ang National Board sa Liga ng mga Barangay dunay direktiba nga pugngan una ang chapter elections samtang magdiskotir pa sa memorandum sa DILG human aprobahi sa kongreso ang pag-uswag sa eleksyon sa sunod tuig.

Si Vice Mayor Edgar Labella nasayod nga fixed term si Zapra sa 2013 ngadto sa 2016 apan human mauswag ang piniliay nalugwayan ang iyang termino. Tungod niini nahasol usab ang ubang mga ex-officio members sa barangay, lungsod ug probinsya.

Laing sab kining balaodnon ni Majority Floorleader Rodolfo Fariñas nga mag-umol sa Phil. Legislative Police (RA 6208) nga maoy tahasan sa seguiridad sa 292 ka mga kongresista ug 24 ka mga senador hulip sa PNP nga naistablisar niadtong Dis. 13, 1990 (RA 6975). Laing lakang ni Fariñas nga dili dakpon ang mga magbabalaod kon makalapas sa lagda sa trapiko aron dili malangay sa ilang mga bulohaton sa kongreso. (csa_1156@yahoo.com/0916-734-5737)

Gipatik sa mantalaang Superbalita Cebu Oktubre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments