Albor: Gustong moani sa iyang pinugas | SunStar

Albor: Gustong moani sa iyang pinugas

Time to read
1 minute
Read so far

Albor: Gustong moani sa iyang pinugas

Friday, November 10, 2017

NAUGMAD ang 295 ektarya nga South Reclamation Project (SRP) sa 1995-2005 panahon ni Mayor Tomas Osmeña. Migasto og 26.33B nga inutang sa Japan International Cooperation Agency (JICA) nga katambayayong ang Land Bank.

Maimpas sa 2025. Gibaligya ni Osmeña ang tipik sa SRP sa Bigfoot nga sa ka film industry, 10.5 ektarya sa Filinvest, 40 ektarya joint venture tali sa Filinvest ug kagamhanan sa siyudad pinaagi sa pagpamaligya og condo units ug 30 ektarya sa SM Prime Holdings nga gitukoran sa simbahan ni San Pedro Calungsod ug SM Seaside City.

Pagpuli ni Mayor Michael Rama dili gusto si Osmeña nga makabaligya sa nahibiling luna pinaagi sa Ordinance 2332 nga gilansang sa konseho nga gidominar sa BOPK.

Apan kalit nga nabali ang hangin kay gitugotan sa konseho si Rama nga makadispatsar sa 45.2 ektarya sa SRP sa kantidad nga 16.7B nga gipalit sa SM Prime Holdings, Ayala Land ug Fil-invest ubos sa pasiunang bayad nga 8.7B. Dinhi magsugod ang kasuko ni Osmeña ngadto sa tulo ka mga dagkong developers sanglit gustong maoy moani sa iyang pinugas.

Iyang gikiha sila si Henry Sy Sr., Jose Cuisia Jr., Hans Sy ug Imelda Lim sa kapakyas pagbayad sa hustong buhis sa ilang patigayon nga SM Seaside. Wala paisyohi og occupancy ug business permits ang mga tenants ug establisamento nga nag-abang sa SM Seaside ug Filinvest.

Hangtod nga mimando ang mayor nga sirad-an ang SM Seaside nunot sa pagdumili sa siyudad sa aplikasyon pag-renew sa business permits, locational clearance lakip na sa permiso sa pag-operate sa elevators ug escalators gumikan sa kalapasan sa national building code ug wala pagbayad sa tukmang buhis.

Apan ang SM nakakuha sa korte og 72-hour TRO, preliminary injunction ug status quo ante. Gigukod usab ang IL Corso sa SRP nga gipanag-iya sa Filinvest nga ang estraktura mikawhat sa sidewalk.

Samtang gikwestyon ang kaubos sa bulohisan sa East West Bank nga kauban sa Filinvest nga gipanag-iya sa Ayala Group of Companies ug ingon man sa BPI ug BDO nga gipanag-iya sa SM Prime Holdings.

Gipasakaan og kaso ang BDO-Magallanes ug pasirad-an sa pasangil nga nanikas sa bulohisan apan ang RTC miisyo og preliminary injunction nga nagdili ni Mayor Osmeña pagpanghilabot sa 28 ka mga sangang buhatan sa BDO.

Ning ulahi gibasura ni Mayor Osmeña ang aplikasyon sa business permit sa BDO kay wala makaduso sa Notarized Joint Statement of Annual Income. Wala malakip ang BDO-SM kay bag-o. Tutokan ni Osmeña ang pagbaligya sa tulo ka ektaryan luna sa SRP sa tag P110,000 matag metro kwadrado sa kantidad nga 3.3B.

Gipatik sa mantalaang Superbalita Cebu Nobyembre 11, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments