Diputado: Hello Rodrigo | SunStar

Diputado: Hello Rodrigo

Time to read
2 minutes
Read so far

Diputado: Hello Rodrigo

Tuesday, November 14, 2017

USA mga init nga isyo panahon sa ASEAN Summit nga gihimo karon sa Manila mao ang gihimong lihok-protesta sa mga walhong grupo.

Mireklamo sila nga “over-kill” ra kuno ang gihimo sa kapolisan, sama sa pag-gamit og “sonic weapon.”

Daghan ang nasamdan, daghan ang nasakitan, daghan ang mireklamo nga sobra ra.

Kinsa pa may matingala niining tanan?

Naandan na kini mahitabo nga panahon sa ilang lihok-protesta, aduna gyoy kagubot nga mahitabo sanglit init kaayo ang huna-huna sa duha ka panig.

• • •

Sukad sa akong pagkat-on og buot, balik balik na lang kanang ilang hisgot og “imperyalismo,” “tuta sa amerika,” “undangon ang militarismo,” og uban pa.

Makita sab nato ang pagsunog og mga plakards, mga hinimo nga “effigy” sa ilang kontra nga ilang sunogon, apil na ang makabungog nga pag-siyagit sa ilang mga reklamo og pag-isa sa kamot sa makadaghang higayon.

Tungod sa kainit sa ilang gisulti, ang mga kauban mainit sab mao nga dali ra kaayo magubot sanglit giinit na man daan ang ilang mga huna-huna.

Bisan kinsa pa nga presidente, kanunay na lang nila tawgon og tuta sa mga amerikano og langyaw nga mga interes.

Balik-balik na lang og wala nay bag-o pa niining tanan.

Kon dunay kagubot nga mahitabo, segurado nga ipakita nila sa publiko ang maong hitabo aron pagmatuod nga nag-abuso ang mga polis sa ilang gahom. Labi na gyod kon dunay mga biktima nga mga babaye, mga bata nga nagkadugo.

Atake taman sa ginhawa sa gobiyerno, sa presidente, og bisag unsa na lang, bahala og kwestiyonable ang ilang gipanulti, basta mainit lang ang ilang mga kauban.

Tungod niini, dali ra sab kaayo maghugop ang mga nagprotesta og isog na kaayo nga mosukol sa engkwentro sa kapolisan, kusog batok kusog.

• • •

Sa mga lihok nga ingon niini, dunay ibutang nga lugar nga gamiton sa mga nag-protesta. Sulod sa maong lugar, libre sila sa ilang buhaton o isulti.

Kon magpabilin lang sila sa maong lugar, bahala og unsay ilang isulti, segurado nga way kagubot mahitabo.

Apan kon mogawas sila sa maong lugar, og ilang adtoon ang nahimutangan sa mga kapolisan, segurado gyod nga dunay kagubot mahitabo.

Karon, kon dunay kagubot mahitabo, kinsa may angayan basolon, ang mga nagprotesta o ang kapolisan?

• • •

Daghan ang natingala sa dihang mi-diskurso si US President Donald Trump unya deretso niya gitawag ang presidente sa Pilipinas sa pangalan niini nga “Rodrigo.”

Kasagaran nga mahitabo, pormal ang pagtawag sa usa ka opisyal sama sa “Mr. President” o “Mr. Prime Minister” sa mga okasyon sama sa gihimo sa Manila isip host sa ASEAN Summit.

Gituyo ba kini ni Pres. Donald Trump?

Unsay buot niya ipasabot sa pagtawag sa deretso nga pangalan sa Presidente?

• • •

Nagpabilin ba ang pagtahod ni Trump kang Duterte bisan kon gitawag niya kini og “Rodrigo?”

O, nagpasabot kini nga wala motahod o nakamenos lang si Trump sa presidente sa Pilipinas?

Ang klaro niining tanan mao nga mas suod ang panaghigalaay ni Duterte kang Donald Trump kay ni kanhi US President Barack Obama nga gitawag pa ni Duterte og “putang ina.”

• • •

Daghan ang naapektohan niining pag-host sa Pilipinas sa ASEAN Summit karong tuiga.

Tiaw bay usa ka linya sa EDSA gihimo nga “ASEAN lane” og dili pwedeng gamiton sa ubang mga tawo.

Sa ka baga sa trapiko sa EDSA matag adlaw, lisod sabton ang kaguliyang nga mahitabo kon kuhaan pa gyod kini og usa ka linya nga dili pwedeng gamiton sa mga tawo.

Apan kon dili sab kini buhaton, dako sab nga problema kon dunay apil sa kalihokan sa ASEAN nga maulahi o madisgrasya ba kaha tungod sa kalisod sa trapiko sa EDSA.

Tungod niini, masabtan ra sab nato ngano nga husto ra sab ang ilang gibuhat sa pagbutan og ASEAN lane.

• • •

Bakikaw kaayo tan-awon kining pipila ka mga politiko nga dali ra kaayo maka-kumo sa ilang tuong kamot kon magpa-hulagway na gani, labi na kon naa si Presidente Rody Duterte.

Sa mga nangaging panahon, kining mga tawhana maoy kusog kaayo mohimo og litra nga L sa ilang tuong kamot nga nagpasabot og Liberal Party.

Panahon sa kampanya sa 2016, kini sila didto dapig ni Mar Roxas nga maoy kandidato sa Liberal Party sa pagka-presidente.

Sa dihang midaog na si Digong Duterte pagka-presidente, abtik pas iring kining maong mga politiko nga mo-kumo sa ilang tuong kamot.

Dako pa kaayong tingsi sa ilang wa-it sama sa usa ka buaya nga nakatukob og manok.

Matod pa sa uban, pagka-baga sa fez oi.

Gipatik sa mantalaang Superbalita Cebu Nobyembre 15, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments