Editoryal: Ang pagbalik sa PNP | SunStar

Editoryal: Ang pagbalik sa PNP

Time to read
1 minute
Read so far

Editoryal: Ang pagbalik sa PNP

Wednesday, December 06, 2017

Editorial Cartoon by Ariel Itumay

SO pinaagi sa memorandum nga gipirmahan ni Presidente Rodrigo Duterte sa niaging adlaw, mobalik na ang Philippine National Police (PNP) sa pagkaaktibo sa kampanya batok sa gidiling drugas sa nasod.

Kini human mabantayi nga misaka pagbalik ang pagkatap sa illegal drugs sa dihang gitangtang sa presidente ang PNP sugod niadtong Oktubre 10 sa iyang hugot nga kampanya batok sa gidiling drugas. Nalambigit man gud ang pipila ka mga sakop niini sa kontrobersiyal nga buy bust operation.

Daghang police operations nga nangapalpak tungod kay lagi gisakyan man sa mga abusadong tinugyanan sa balaod nga nakapalarma sa publiko kay bisan mga inosenting sibil­yan ug mga menor-de-edad nangaamong na man hinuon.

Sama niadtong pagpusil patay sa menor-de-edad nga si Kian delos Santos atol sa operations didto sa Caloocan City. Si delos Santos kinsa katabang sa iyang amahan sa pagpaninda sa gamay nilang tindahan sa kalit lang gidala sa hilit nga dapit ug didto tipi-a sa way igong rason ug ebidensiya.

Gisundan usab kini sa pagpatay sa 19 anyos nga si Carl Angelo Arnaiz kinsa daw sa gi-torture una patya sa mga tinugyanan sa balaod nga nakapaalarma na sa publiko.

Hinuon ning higayona ang PDEA gihapon ang mangulo sa overall campaign. Sa ato pa sa matag operation sa PNP kinahanglan nga aduna kini pagtugot gikan sa PDEA.

Pero sa gihapon, dili kini maoy garantiya nga dili masakyan sa mga abusadong pulis ug posibling aduna gihapoy mobanaw nga mga dugo atol sa operation.

Samtang atong gihangop kining pagbalik sa PNP sa anti-illegal drug campaign, atong ipanghinaot nga unta mapakgang sa ilang kadagkuan kining mga abusado nilang sakop aron dili makaduhigan og bating imahe ang seryusong katuyoan sa presidente.

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments