Niñal: Hilanat | SunStar

Niñal: Hilanat

Time to read
1 minute
Read so far

Niñal: Hilanat

Wednesday, December 06, 2017

NAMINAW ko gahapon sa buntag ni Bobby Nalzaro nga naghisgot og hilanat sa iyang programa. May kalabotan ni sa isyu ining kontra dengue nga bakuna nga unsang pagkaunsaa naghatag man hi­nuon kabalaka sa mga ginikanan sa mga bata nga nabakunahan.

Laliman mo nang imbis makaayo, naghatag na man hinu­on og peligro. Matod pa sa balita, ang mga bata nga wa pa nakaagig dengue apan nabakunahan na ining gitawag og Dengvaxia ma-expose na hinuon sa mas kuyaw pa nga mga sakit.

Misud na ang NBI sa isyu, ug hinaot manubag ang si kinsa man gani ang angay’ng manubag.

Adunay personal nga kasinatian ang akong pamilya ining dengue, mao nga seryoso ming nagsunod ining isyuha. Akong asawa na-dengue na kaniadto. Akong says anyos na-dengue sab niadtong usa pa siya katuig. Wa pa ko ma-dengue, puyra buyag simbako. Apan di gihapon mi mokom­pyansa kay di nato matagna ang hilanat ron.

Kausa, dihang nanghigda na mi sa akong asawa sa katre padung matulog, iya kong giingnan, “You’re hot.” Tubag pud ko, “You’re hot, too,” dayong kidhat pinaigat.

“Pagpuyo oy,” badlong pa niya. “Init gyod ka, hilanat nga init,” ingon siya, da­yong tapion sa iyang kamot sa akong agtang. Ug tuod man, gidanggas gyod ko, ug mitomar dayon kog tambal.

Isip ginikanan, kuyawan ko kon maghilanat na akong mga bata kay basin dengue na pud ni. Sa probinsya kaniadto sa bata pa ko, way kurat ang hilanat. Usahay mag-ampo pa gani ko nga mahilantan kay daghag benefits.

Una nga benefit, mas pi­nangga ko ni mama kon hilantan ko. Iya kong hungitan, hilot-hiloton, hapyod-hap­yo­ron ang agtang, hapit na lang di mobiya sa akong kiliran.

Ikaduha, makainom kog Mi­rinda o Tru-Orange. Mao ni ang labing kinaham nako nga bahin sa hilanat. Dili ka-afford akong mama og soft drink kaniadto. Ang mag-soft drink sa among panahon kato rang may kwarta.

Maglaway intawon ko nga mag­tan-aw sa akong mga classmates nga mga anak og dato nga mag-soft drink dayon inig recess samtang ako ice water ra.

Apan kon hilantan ko, mang­gawas ang mga tinagoang sinsiyo ni mama aron lang palitan kog Mirinda. Ug haskang buanga moarang-arang man sab akong pamati nga no approved therapeutic claim man unta ning soft drink.

Karon nga amahan na ko, wa ni nako gi-apply sa akong mga bata. Ang hilanat ron di na madag soft drink.

Apan ako, mingawon giha­pon usahay sa mga hilanat sa akong kabatan-on. Kausa, sam­­tang naghigda na sab mi ni misis padung matulog, giing­nan na sab ko niya, “You’re hot.”

Ug sa tingog nga daw na­ma­­rayeg sa inahan, mitubag ko, “Paliti kog Mirinda.” Mikatawa a­­­kong asawa, ug sa bugnaw ug pinahunghong nga tingog mii­­ngon, “Way bi­­nuang, you’re sooo hot,” dayong kidhat sa igat.

Ug nanginit akong lawas sobra pa’s hilanat.

Gipatik sa mantalaang Superbalita Cebu Disyembre 07, 2017.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments