Editoryal: Train ni Duterte | SunStar

Editoryal: Train ni Duterte

Time to read
1 minute
Read so far

Editoryal: Train ni Duterte

Wednesday, January 03, 2018

Editorial Cartoon by Ariel Itumay

DAGHAN ang nagmaya nga mga namumuo sa dihang gipahibawo sa administrasyong Duterte nga dili na buhisan kadtong mga empleyado nga nagsuweldo og P21,000 ug paubos matag buwan o kadtong dunay P250,000 nga tinuig nga income.

Kini mapatuman ubos sa bag-ong balaod nga napirmahan na sa presidente nga mao ang Tax Reform for Acceleration and Inclusion (Train) Law.

Buot ipasabot nga tungod niini madako-dako na unya ang suweldo nga madala sa empleyado ngadto sa ilang pamilya, butang nga ikalipay sa matag usa.

Pero unsa ba gud diay nga nalakip sa pagpahamtang sa Train Law mao ang pagpataas sa mga buhis sa sakyanan, sa mga softdrinks, ug labaw sa tanan, ang sa gasolina.

Kon gasolina na gani ang mosaka, di kalikayan nga mosaka usab ang pletihan ug ang tanang mga palaliton.

Ang buhis na unya sa diesel mousbaw ngadto sa P2.50 matag litro ug sunod tuig motaas na pud ngadto sa P4.50 ug P6 na sa 2020. Ang LPG mousbaw ngadto sa P1 matag kilo ngadto na sa P2 ug P3 sa sunodsunod nga tuig.

Karong tuiga P7 na ang buhis sa regular ug unleaded ug premium gasoline gikan sa P4.35, ug moabot kini og P9 ngadto sa P10 sa sunod nga duha ka tuig.

Gipasabot sa administrasyon nga kini ilang gihimo aron pagpataas sa kita sa gobiyerno nga maoy makatabang sa infrastructure program sa presidente nga moabot ngadto sa P8 trilyones ang gastuhan.

Di kaha magsakiig na unya ang mga kabus sa kamahal sa mga palaliton niini?

Maayo siguro nga susihon og balik kining balaora kay kini makapahinumdom kanato niadtong sa panahon sa Martial Law sa rehiming Ferdinand Marcos nga nagmahal usab ang tanang palaliton.

Gipatik sa mantalaang Superbalita Cebu Enero 04, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments