Barrita: Warning sa Ginoo | SunStar

Barrita: Warning sa Ginoo

Time to read
1 minute
Read so far

Barrita: Warning sa Ginoo

Thursday, January 11, 2018

NAGTUO si Cebu City Mayor Tomas Osmena nga ang sunog sa Metro Ayala usa ka warning gikan sa Ginoo. “This is God’s warning to us. If that Metro Ayala were a high-rise residential building, wow, that will be the nightmare of my life,” matod pa niya.

Pero si kinsa man ang giwarningan sa Ginoo? Si Osmeña ra ba? Lakip ba ang atong kabomberohan? O kitang tanan? Daghan nang sunog nga niulbo sa syudad sa Sugbo samtang si Osmeña maoy mayor, ang sunog ra gyud sa Metro Ayala maoy warning?

Tingali makaingon si Osmeña nga warning kadto kay way kinabuhi nga nakalas, di sama sa nahitabo sa syudad sa Davao niadtong Disyembre nga nikalas og 38 ka mga kinabuhi. Kon giila pa unta ang ma­tag sunog nga warning, mag­bantay unta ang tanan batok sa sunog.

● ● ●

Unsa man ang gibuhat sa mayor human sa warning sa Ginoo? Iyang gimandoan ang Office of the Building Official (OBO) nga pugngan una ang pag-aprobar sa building permit applications sa 31 ka medium ug high-rise buildings samtang gisusi pa sa syudad ang sunog sa Metro Ayala.

Matod pa ni Osmeña, “I’m thinking that if there is a fire, and there’s a ladder that can reach 18 storeys, can that ladder evacuate 13 storeys of residents? The answer is no.”

Sa laktod, ang iyang gihimo mao ang pag-ban sa mga high-rise buildings tungod sa iyang kabalaka nga maigo kini og sunog. Apan unsa may iyang buhaton niadtong mga high-rise building nga natukod na?

● ● ●

Sila si Konsehal Raymond Garcia, Philip Zafra and Jose Daluz III namahayag nga anti-business ang gibuhat ni Osmeña. Inay did-an ang mga developers sa pagtukod og mga high-rise building, mas maayo alang kanila nga dugangan ang mga ekipo sa atong kabomberohan sa pagkombati sa sunog.

Apan alang kang Osmeña, mas mahinungdanon ang ki­na­buhi sa mga tawo kay sa pag-ugmad sa ekonomiya. “Well, I’m sorry but I’m the mayor. I don’t care what they think. The lives of the people come first,” matod pa niya.

Mao lagi. Pero daghan na kaayo ang mga high-rise building dinhi sa syudad sa Sugbo. Di na man kini mahimong ibton o putlan ang gitas-on.

● ● ●

Si Senior Supt. Samuel Tadeo, hepe sa Bureau of Fire Protection (BFP) 7, niingon nga duna silay trak sa bombero nga may aerial ladder nga makaabot sa 18 ka andana aron makaresponde niadtong mga sunog sa mga high-rise buildings.

Apan unsay mahitabo kon ang building nga masunog sobra sa 18 ka andana? Maayo tingaling klaruhon nga motrabaho ang mga sprinkler kay di unya maabot sa mga bombero.

Maghuwat pa ba sila og laing warning, simbako?

Gipatik sa mantalaang Superbalita Cebu Enero 12, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments