Nadela: Pangaliya sa Milagrosong Bata | SunStar

Nadela: Pangaliya sa Milagrosong Bata

Time to read
1 minute
Read so far

Nadela: Pangaliya sa Milagrosong Bata

Friday, January 12, 2018

SA coverage sa unang  adlaw sa siyam ka adlaw nga novena alang sa kapistahan ni Señor Santo Niño daghan ang nipaambit sa ilang mga petisyon.

Dunay nangaliya og maayong panglawas, trabaho, kalamposan sa pag-eskwela ug kalinaw sa tibuok kalibutan.

Dunay nihisgut nga gawas sa ilang pamilya ila sab giampo ang atong mga kaigsoonan nga nag-ilaid sa tumang kalisod.

Mga biktima sa gubat ug katalagman. Giapil sab nila og ampo kadtong nahisalaag sa hiwi nga kinabuhi sama sa mga adik ug mga kiriwan og kamot.

Nindot paminawon kay nagpakabana sab sila uban inay ila rang kaugalingong pamilya ra’y maluwas gikan sa kalisdanan. Parehas gud anang mag-ampo ta nga ipalayo lang ang bagyo.

Ang sakto siguro nga hilison ang bagyo nga mahimo nalang nga low pressure. Kay kung ipalayo looy sab kaayo ang maigo.

Kung sa dagat mag land fall luoy sab kaayo ang mga mananagat ug marinero nga maatlan.

Unya sa mga niapil sa Walk with Jesus gikan sa Fuente Osmeña siguro nakabantay mo sa dakong kausaban sa siguridad nga gipatuman.

Sakto ang giingon ni PRO 7 Director Jose Mario Espino nga dungagan pa ang mga kausaban.

Sama pananglit sa iyang giingon nga  emergency lane sa sulod sa Pilgrim Center. Makita man gud nga ang tanang dapit puno sa tawo ug wa nay kaagian alang sa mga nauwahi ug sud.

Kung dunay emergency asa man nimo paagion aron madali pagpasud sa mga responder.

Di lang sa panginahanglang medikal apil na ang pagres­ponde sa kapulisan kung dunay krimen nga mahitabo.

Si City Councilor Dave Tumulak sa iyang bahin nanawagan sa tanan sa pagsabot sa mga bag-ong security measures nga ilang gipatuman.

Kini naglakip sa pagsira sa usa ka bahin sa mga karsada. Ang entrance ug exit sa mga manimbahay.

Sa mga nabag-ohan wa mahimuot.

Sa akong pagtoo angayan nga mag-anad anad ta aron nga malikayan ang mas bug-at nga puwerhisyo sa wa nato pagpakabana.

Mamista

Mopadayon ka ba sa imong kaliwat ug kahigalaan nga gustong mamista sa Senyor sunod semana.

Nangutana ko niini kay sama sa nangaging kapistahan daghan ang nahimuot daghan sab ang nagbagutbot.

Ingon ani man gud ni. Sama namong taga  bukid nindot untang ipamista sa mga kaliwat nga nia sa siyudad nagpuyo.

Ang problema kung way paryente nga kaduolan. Kung naa man gani magpangikog sab ta.

Maong moingon ang uban mas nindot pa gihapong pamistahan didto sa bukid labi na kung kumbira maoy hisgutan.

Gipatik sa mantalaang Superbalita Cebu Enero 13, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments