Editoryal: Ayaw palauma | SunStar

Editoryal: Ayaw palauma

Time to read
1 minute
Read so far

Editoryal: Ayaw palauma

Saturday, January 13, 2018

GUSTO sa usa ka transport cooperative nga umentuhan ang pletihan tungod sa gipaabot nga dakong pagsa­ka sa petroleum products. Apan nakapanghupaw og lawom ang mga sumasakay sa pahibawo sa Land Trans­portation Franchising and Regulatory Board (LTFRB) nga hang­t­od sa Marso wa pay umento sa pletihan.

Gawas sa agian pang mga proseso sa pagpaumento, ang mo­dernisasyon sa public utility jeepney (PUJ) usa sa mga dakong rason nga di pa diha-diha mapatuman ang umento. Maayo kini nga kalamboan, apan di usab makompyansahan.

Tungod kay bag-o ang mga unit unya taas pa ang presyo sa lana, basin kon labaw pa sa pangayuong P6 nga umento ang antuson sa yanong mga sumasakay.

Angay nga di palaumon sa kagamhanan ang publiko nga maorag way umento kay bisan unsaon og kwentada, balido ang yangongo sa public transport. Nakasabot niini nga sentimento ang publiko. Ang lalisan pa, kon pila.

Posible usab nga laing factor sa umento mao ang gastuhan sa mga unit kon kuyogan og modernisasyon ang pagsaka sa presyo sa lana. Bisan ang transport sector karon nabalaka nga sa modernisasyon, mosaka og maayo ang pletihan.

Tinuod bitaw kay gikinahanglan nga bawion sa operator ang iyang gasto sa pagpalit sa matag unit. Di kini barato nga unit kon itandi sa nagdagan karon nga mga sakyanan, bag-o o karaan man.

Samtang sayo pa lang, mas maayong angkunon sa kagamhanan nga ang umento sa pletihan di na kalikayan. Apan kinahanglan seguraduon usab niini nga di grabe ang pagsulbong sa pleti kay magsangkiig na hinuon og maayo ang mga sumasakay.

Basin hinuon, inay nga P6 ra ang gipangayo, doblehon na hinuon ang gidak-on. Ning sayo pa lang, di angay magpalaum ang kagamhanan, hisgutan ang umento kay bisan unsaon og tinamban, mao ni ang padulngan.

Gipatik sa mantalaang Superbalita Cebu Enero 14, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments