Nalzaro: Mangurakot gihapon | SunStar

Nalzaro: Mangurakot gihapon

Time to read
1 minute
Read so far

Nalzaro: Mangurakot gihapon

Saturday, January 13, 2018

HALOS doble na ang suweldo nga gidawat karon sa mga sakop sa Philippine National Police (PNP) ug Armed Forces of the Philippines (AFP) sugod karon tuiga. Kini nunot sa salary increase nga gisaad ni President Duterte niadtong iyang pag-asumir sa miaging tuig. Ang suweldo karon sa ordinaryong pulis nga nag-ranggo og PO1, gikan sa P14,000 matag buwan, mosaka na ngadto sa dul-an sa P30,000. Grabeng pagsaka, halos 100 per cent.

Ang mga general, gikan sa P60,000 ngadto na sa sobra sa P100,000 matag buwan. Lain pang-increase ang gipa-abot sa sunod nga katuigan. Matod pa sa kadagkuan sa PNP nga kining gihatag nga increase ngadto sa mga pulis makapadasig sa pag-perform og maayo sa ilang trabaho. Ug ikaduha, makapawagtang kini sa kurapsiyon. Dili na kuno mangutong o mangilkil ang kapulisan sa nahilambigit sa illegal nga kalihukan sama sa illegal drugs ug illegal gambling kay mahadlok na sila magbinoang kay kon masakpan, siguradong matangtang sila sa serbisyo ug masayang ang suweldo ug benipisyo.

Kaha? Sigurado kaha sila nga mahunong na ang kurapsiyon sa kapulisan gumikan sa kataas sa ilang suweldo? Dili na kaha mag-’Oplan Pakilala’ ang mga regional directors, provincial directors ug mga city directors nga ma-assign og bag-ong lugar? Ihatag na kaha sa taga Kampo Crame ang kinatibuk-ang budget sa intelligence funds ngadto sa mga regional, provincial ug city levels?

Dili na kaha nila i-overpriced ang mga equipment nga ilang paliton? Dili na kaha mamaligya og supplies labi pa ang gasoline supplies sa mga generals? Wa na kahay mangutong bisan sa gagmay’ng peryahan sama sa gihimo sa taga Mabolo Police Station sa usa ka peryahan sa Nivel Hills, Busay?

Ang pagkadako og suweldo dili baya garantiya nga ang usa ka opisyal o yanong empliyado sa kagamhanan dili mohimo og binoang kon hatagan og kahigayonan. Naa bitaw taga judiciary, mga huwes ug justices, dagko naman na silag suweldo, apan naa man gihapoy kurapsiyon. Si kanhi presidente Joseph Estrada nakombikto og plunder gumikan sa pagpangawkaw. Daghan og kuwarta si Erap apan nangawkaw pa. Walay katagbawan ang tawo. (bobbygnalzaro@gmail.com)

Gipatik sa mantalaang Superbalita Cebu Enero 14, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments