Barrita: Mapalagpot ba sa Ombud ang usa ka kongresista? | SunStar

Barrita: Mapalagpot ba sa Ombud ang usa ka kongresista?

Time to read
1 minute
Read so far

Barrita: Mapalagpot ba sa Ombud ang usa ka kongresista?

Wednesday, February 14, 2018

SI Ombudsman Conchita Carpio Morales, sa Enero 15 nga desisyon nga gipahibawo niadtong Lunes, nimando sa pagpalagpot sa katungdanan ni Deputy Speaker Gwendolyn Garcia, kongresista sa tersero distrito sa lalawigan sa Sugbo.

Nagsukad kini sa P24.47 milyunes nga proyekto sa pag-supply og filling materials alang sa bahin sa gipalit sa probinsya nga gikan sa mga Balili sa Tinaan, syudad sa Naga, nga anaa sa ilawom sa dagat, samtang si Garcia pa ang gobernador niadtong 2012.

Gipalit sa Kapitolyo ang maong yuta niadtong 2008 sa kantidad nga P98.93 milyunes. Apan nadiskubrehan nga 196,696 metro kuwadrado o 79 porsento sa 249,246 ka metro kuwadrado nga luna anaa diay sa ilawom sa dagat ug katunggan. Ang mga kaso sa graft ug malversation bahin sa maong transaksiyon pending pa sa Second Division sa Sandiganbayan.

Apan ang atong pangutana, aduna bay gahom ang Ombudsman sa pagpalagpot sa usa ka magbabalaod, sa usa ka senador o kaha sa usa ka kongresista sama ni Garcia?

Si Speaker Pantaleon Alvarez di mopatuman sa dismissal order sa Ombudsman kay wa siyay nakitang probisyon sa Constitution nga nag-ingon nga mahimo kini. Matod niya gisilotan unta sa Ombudsman si Garcia samtang gobernador pa siya ug ubos pa sa hurisdiksyon niini. Si Alvarez niingon nga bugtong ang House of Representatives da ang makadisiplina sa mga sakop niini.

Mao tingali nga gikorehean sa Ombudsman media bureau ang ilang pamahayag gikan sa “directed Speaker Pantaleon Alvarez to implement the order” ngadto sa “directed that a copy of the decision be furnished to Speaker Pantaleon Alvarez for appropriate action.”

Ang Article VI, Section 16 (3) of the Constitution nagkanayon, “Each House may determine the rules of its proceedings, punish its members for disorderly behavior, and, with the concurrence of two-thirds of all its Members, suspend or expel a Member. A penalty of suspension, when imposed, shall not exceed sixty days.”

Dinhi atong makita nga lisod ang pagpalagpot sa usa ka kongresista kay kinahanglan pa kining uyonan sa two-thirds sa kinatibuk-ang mga sakop sa House of Representatives.

Sama usab sa Senado. Si House Majority Leader Rodolfo Fariñas niingong nga hayan ang kaso ni Garcia samag padulngan sa kaso ni Sen. Joel Villanueva nga gimandong palagputon sa katungdanan sa Ombudsman niadtong 2016 tungod sa giingong misuse sa P10 milyunes nga pork barrel isip usa ka party-list congressman.

Apan ang Senado nakahukom nga ang Senado da ang makadisiplina sa mga senador busa wa ipatuman ang mando sa Ombudsman.

(edbarrita@gmail.com)

Gipatik sa mantalaang Superbalita Cebu Pebrero 15, 2018.

Latest issues of SunStar Superbalita-Cebu also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.

View Comments