Diola: Asin ug Kahayag

Fr. Carmelo O. Diola, SSL

Mao Diay

Binasi sa Isaias 58:7-10; Salmo 112:4-9; 1 Corinto 2:1-5; ug Mateo 5:13-16

Ilado na kaayo si Heidi Mendoza sa tibuok Pilipinas. Siya ang kanhiay COA Senior Auditor nga nahimong saksi sa General Garcia plunder case. Sa atong mahinumdoman gisulayan og paubos ang kaso ug hatagan og ubos nga silot ang heneral, sa dihang mibarog si Heidi isip usa sa “truth-teller.” Siya man god ang mitutok sa kaso sukad pa sa 2004 ug kombinsido siya nga “air-tight” kini.

Gahapon pipila kanamo nagparitrato didto sa IT park aron adunay kamiy mapadala kang Heidi nga timailhan sa among pagduyog ug pagsuporta kaniya. Nagdaag-om ang panahon ug walay klaro kon mohayag ba o moulan. Morag nakigduyog ang panahon sa mga panghitabo sa atong nasod: adunay kahayag ug aduna poy kangitngit. Usahay ang kangitngit buot mopatigbabaw apan ang kahayag sa pagtuo dili malupig. Si Heidi tinukmod sa iyang pagtuo. Siya asin ug kahayag.

Nagpahinumdom kanato ang ebanghelyo sa tawag sa mga Kristohanon nga mamahimong asin og kahayag sa kalibutan.

Sumala pa sa mga karaang tawo, “wala nay labaw pa sa asin ug kahayag sa adlaw sa pagkamaposlanon.” Kon walay asin ug kahayag walay mabuhi. Walay lami ang pagkaon ug dali kining madaot kon walay asin.

Diha sa Bibliya gilambigit ang asin sa sakripisyo nga gihalad ngadto sa Ginoo. Sagolan og asin ang mga sakripisyo nga ihalad sa Ginoo. Bisan gani ang insenso nga milarawan sa atong mga pag-ampo sagulan pod og asin. Ang lawas sa mga bag-ong natawo asinan aron mapahilayo sa sakit. Hinloan ang atabay nga hugaw og tubig pinaagi sa asin.

Tungod sa makapabuhi ug makapahinlo nga kalidad sa asin nahimo kining simbolo sa kasabutan tali sa tawo ug Ginoo nga walay kataposan.

Sa laing bahin, gihisgutan usab ang kahayag isip unang binuhat sa Diyos, nga dili nagagikan sa adlaw o mga bituon kondili kahayag nga binuhat sa Diyos. Nag-agad sa maong kahayag ang ubang mga binuhat sa Diyos. Kon walay kahayag ngitngit ang tanan ug dili kita magkainilhanay, mao nga mag-una gayod ang kahayag.

Ang kahayag mao ang tuburan sa kinabuhi ug maghatag og han-ay sa kalibutan. Ang makadawat og kahayag modan-ag usab sa maong kahayag ngadto sa uban. Madawat nato ang kahayag sa Ginoo diha sa atong kahiladman pinaagi sa pag-umol sa tanlag ug sa tinarong nga panghunahona. Sa ato pa, ang tawag sa Kristohanon isip usa ka asin og kahayag tawag sa pagsaksi sa atong Kristohanong pagtuo nga subay sa pagtulon-an sa Simbahan.

Asin ug kahayag si Heidi. Kitang tanan isip mga Pilipino, isip trabahor sa nagkalainlaing sektor sa katilingban, isip trabahador sa pangagamhanan, gitawag nga mahimong asin og kahayag. Nagpasabot kini nga kinahanglan kamatuoran ang atong poy-an, itudlo sa uban, ug atong ilitok. Magpatakod kita kang Heidi ug lupigon na nato ang atong pagkamahadlukon ug pagkawalay pagpakabana.

Kinahanglan kita manggilabot ug mamahimong kahayag og asin aron magpabiling buhi ang atong katilingban ug mahatagan og maayong timpla ang atong pang-adlaw-adlaw nga kinabuhi. Gipakita kanato sa mga gisulti ni Heidi nga grabe na kaayo ang sakit sa pagpangurakot sa atong katilingban.

Ang pagpangurakot, dili ang tawo maoy problema. Kinahanglan padalion ni P-Noy ang paghimo sa mga balaod batok sa pagpangurakot, sama sa “Whistleblowers’ Protection Bill” ug ang “Right to Information Bill.” Nganong RH bill man hinuon ang gipadali nga ang problema dili ang gidaghanon sa tawo kondili ang pagpangurakot?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph